Kinyarwanda
English
Swahili
Minisitiri Nduhungirehe yageze Addis mu Nteko rusange ya Afurika Yunze Ubumwe
Minisitiri w’Ububanyi n’Amahanga n’Ubutwererane w’u Rwanda Olivier Nduhungirehe yageze Addis-Ababa muri Ethiopia agiye kwitabira inama nkuru zifatirwamo ibyemezo biyobora Umuryango w’Ubumwe bwa Afurika.
Mu butumwa yanyujije ku rubuga rwe rwa X, Nduhungirehe yanditse ati "uyu mugoroba nageze mu Mujyi w’iwacu wa Addis Ababa kugira ngo nitabire inama isanzwe ya 48 y’Inama y’Ubutegetsi (Executive Council) n’inama isanzwe ya 39 y’Inteko Rusange y’Umuryango wa Afurika Yunze Ubumwe (AU)."
Inama isanzwe ya 39 y’Inteko Rusange y’Abakuru b’Ibihugu na za Guverinoma b’Umuryango wa Afurika Yunze Ubumwe (AU) izaba ku matariki ya 14–15 Gashyantare 2026 i Addis Ababa, muri Ethiopiya. Insanganyamatsiko yayo igira iti: “Kwihaza ku mazi no gushyiraho gahunda z’isuku zitekanye hagamijwe kugera ku ntego za 2063.”
Iyi nama biteganyijwe ko izibanda ku mutekano w’amazi, isuku n’isukura,ivugurura ry’inzego, ndetse n’ibikorwa bigamije amahoro n’umutekano.
Ingingo z’ingenzi zizaganirwaho mu Nteko ya 39 ya AU zirimo:
Insanganyamatsiko y’Umwaka: Kwita ku kuboneka kw’amazi ku buryo burambye n’imirimo y’isuku n’isukura itekanye mu rwego rwo gushyigikira Gahunda ya 2063.
Ivugurura ry’Inzego: Guteza imbere ivugurura ry’Umuryango wa Afurika Yunze Ubumwe riyobowe na Perezida wa Kenya William Ruto.
Amahoro n’Umutekano: Kungurana ibitekerezo ku kurangiza amakimbirane, guteza imbere ituze, no gushyira mu bikorwa Imiterere Nyafurika y’Imiyoborere (AGA) n’Imiterere Nyafurika y’Amahoro n’Umutekano (APSA).
