Kinyarwanda
English
Swahili
Rusizi: Imvura yangije hegitari zisaga 80 z'umuceri
Abayobozi ba Koperative z’abahinzi b’umuceri bakorera mu gishanga cya Bugarama mu Karere ka Rusizi, bavuga ko nubwo igikorwa cyo kubarura ubuso bwangijwe n’imvura idasanzwe kitararangira, bamaze kubarura hegitari zirenga 80 zangijwe n’imvura idasanzwe yaguye muri iki kibaya.
Ku mugoroba wo ku wa 26 Mutarama 2026, nibwo muri iki kibaya haguye imvura idasanzwe yarimo urubura n’umuyaga.
Iyi mvura yaguye mu mirenge itandukanyr irimo Bugarama, Muganza, Nyakabuye na Gikundamvura.
Ummwe mubahinzi b’umuceri witwa Byishimo Emmanuel yabwiye IGIHE, ko iyi mvura yabateje igihombo kuko umuceri aribwo wari ukimara kwera, ahenshi batarasarura.
Yagize ati “Nageze mu murima nsanga urubura rwawukubise wose uhungukira hasi. Ni igihombo kuko nubwo dufite ubwishingizi budusubiza igishoro ntabwo bushyiraho inyungu umuhinzi yari kuzabona”.
Abayobozi ba koperative enye zihinga umuceri mu Kibaya cya Bugarama, bagaragaza ko imvura yangije hegitari 82, zirimo hegitari 45 z’abahinzi bo mu murenge wa Gikundamvura, hegitari 23 z’abahinzi bo mu Murenge wa Bugarama, hegitari 14 z’abahinzi bo mu Murenge wa Nyakabuye na hegitari 5 zo mu Murenge wa Muganza.
Perezida wa Koperative, COPRORIKI, ihinga umuceri mu Murenge wa Gikundamvura, Hamenyimana Oscar, yavuze ko bamaze kubarura hegitari 45 zangijwe n’iyi mvura.
Ati “Twahise duhamagara mu kigo twafashemo ubwishingizi, tujyana mu murima kubereka uko bimeze. Harakurikiraho kubara ubuso bwa buri muntu kugira ngo azashumbushwe”.
Yashimye gahunda yo gushinganisha ibihingwa, asaba abahinzi bahinga ibihingwa byishingirwa birimo umuceri, ibigori, ibishyimbo, n’imiteja ko bajya bayifatira ubwishingizi.
Umuyobozi wa Koperative y’abahinzi b’umuceri ba Nyakabuye na Muganza KOIMUNYA, Furaha Samuel, we yavuze ko uretse hegitari zabo 23 zangijwe n’imvura, ngo iyo mvura yanabangirijwe ububiko bw’umuceri.
Ati “Ni ububiko bufite agaciro ka miliyoni 20 Frw twari twabwubakiwe n’akarere. Turasaba umushinga CDAT uri gukorerwa mu karere ka Rusizi ko wadufasha tukabona ubundi bubiko bw’umuceri”.
Umuyobozi wungirije w’Akarere ka Rusizi, ushinzwe iterambere ry’ubukungu, Habimana Alfred yavuze ko bari gukusanya imibare y’ibyangiritse, bufatanyije n’ibigo by’ubwishingizi n’inzego z’ubuhinzi, kugira ngo abahuye n’ibiza bafashwe mu buryo bwihuse.
Mu byangijwe n’iyi mvura harimo inzu eshanu z’abaturage bo mu Murenge wa Bugarama, zasambuwe n’umuyaga.
