Kinyarwanda
English
Swahili
Rubavu: Inyubako y’ubucuruzi yafashwe n'inkongi irashya irakongoka
Inyubako y'Uwitwa Ntawangwanabose Protogène iherereye ahazwi nko kuri Labamba, mu Kagari ka Bugoyi, Umurenge wa Gisenyi, mu Mujyi wa Rubavu yafashwe n’inkongi y’umuriro irakongoka yo n’ibyayicururizwagamo byose.
Ibi byabaye ahagana saa yine z’igitondo cyo kuri uyu wa mbere,tariki ya 16 Gashyantare 2026.
Umunyamabanga Nshingwbikorwa w’Umurenge wa Gisenyi, Uwineza Francine, wahise atabara igishya, yavuze ko umwotsi watangiye kuyigaragaramo saa yine zirengaho iminota mike ndetse yari ifite ibice byinshi bikorerwamo, birimo ahakoreragamo akabari, resitora, umuryango ukorerwamo ubucuruzi bw’imikono y’amahirwe (beting),ucururizwamo imyenda ihenze na Depo ya sima.
Yagize ati’’ Depo ya sima ni yo ya nyir’inzu, ahandi hakoreraga abakodesha. Iyi nyubako n’ubundi twari twarabwiye nyirayo, kimwe n’izindi ziyegereye ko zigomba kuvugururwa hakajyamo izijyanye n’icyerekezo cy’umujyi. Uwari ufitemo akabari ni we wasaga n’uwamazemo ibye yimuka, ahandi hose byakongokanye n’inyubako.’’
Yavuze ko ishami rya polisi rishinzwe kuzimya inkongi ryahise rihagera rirayizimya, izima itarafatisha izindi.
Yagize ati’’ Nubwo iperereza ryatangiye ngo hamenyekane mu by’ukuri icyateye iyo nkongi,turakeka insinga z’amashayarazi zakoranyeho zigakora sirikwi,umuriro ugafatisha inzu yose.’’
Yavuze ko ikibabaje cyane ari uko,ari inyubako ubwayo,ari n’ibyacururizwagamo,byose nta na kimwe cyagiraga ubwishingizi.
Yaboneye gusaba abafite inyubako z’ubucuruzi bose n’abafite ibyo bazicururizamo, kujya bihutira gushaka ubwishingizi,kuko nk’ubu aha ari nyir’inyubako,ari n’abacururizagamo, bose barahombye bitavugwa.
Kugeza ubu ibyangirikiyemo byose biracyabarurwa n’agaciro kabyo.
