Ibi aba baturage babibwiwe abaturage batandukanye bo mu Mirenge ya Cyanzarwe na Rubavu ihana imbibi na Repubulika iharanira Demukarasi ya Congo,  ku wa 21 Kanama 2025, muri gahunda yo kubegera no kubakemurira ibibazo.

Umuyobozi wa Polisi mu Ntara y’Iburengerazuba, CP Emmanuel Hatari, munama yahaye aba baturage yabasabye kwirinda magendu, kbera ko aho inyuzwa hashobora no kwambukirizwa imbunda zihungabanya umutekano w’Igihugu.

Yagize ati “Murasabwa kwirinda ibyaha nyambukiranyamipaka, birimo icyo kwinjiza magendu, ibiyobyabwenge, inzoga z’inkorano, guca mu nzira zitemewe n’ibindi byose bigira ingaruka ku mibereho yanyu, bikanadindiza iterambere ry’Igihugu.”

Yakomeje agira ati “Iyo abantu bacuruje mu buryo bwemewe bakunguka Igihugu kibona imisoro, nacyo kikabegereza ibikorwaremezo mugatera imbere, none turemera abantu bamwe bakayinyereza bakayishyira mu nda zabo, amashuri, imihanda twakabonye tukaba turabibuze, nimuze dufatanye tubarwanye kuko ahanyuze magendu hatananirwa kunyuzwa imbunda.”

Yakomeje kubibutsa aba baturage ko inzira banyuzamo magendu ari nazo zakoreshwaga n’abacengezi baje guhungabanya umutekano w’Igihugu anababwira ko buri wese ufatiwe mu nzira zitemewe abihanirwa n’amategeko.

Yaboneho gusaba aba baturage kwirinda ibyaha bitandukanye  bufatanye bwa buri wese kubera ko bidindiza iterambere ryabo.

Guverineri w’Intara y’Iburengerazuba, Ntibitura Jean Bosco, we yagaragarije aba baturage ko magendu ari ikibazo gikomeye ku bukungu bw’Igihugu, abasaba kwirinda ibikorwa bimunga ubukungu bw’Igihugu birimo magendu, ruswa, banki lambert no  kwambuka imipaka mu buryo bunyuranyije n’amategeko ndetse no kumenya abinjira n’abasohoka mu midugudu.