Kinyarwanda
English
Swahili
&format=webp)
RDC: Guverineri wa Kivu y'Amajyepfo yasangiye n’abaturage misa ya Pasika
Kuri iki Cyumweru tariki ya 5 Mata 2026, ubwo abakirisitu hirya no hino ku Isi bizihizaga umunsi mukuru wa Pasika wibuka izuka rya Yezu Kristu, Guverineri w’Intara ya Kivu y'Amajyepfo muri Repubulika Iharanira Demokarasi ya Congo, Patrick Busu bwa Ngwi, yifatanyije n’abakirisitu mu gitambo cya misa cyabereye muri shapeli ya Labote i Bukavu.
Iyi misa yayobowe na Arikiyepisikopi François-Xavier Maroy Rusengo, yitabiriwe n’abayobozi batandukanye barimo abari mu nzego za politiki n’iza gisirikare.
Mu ijambo yagejeje ku bitabiriye iri sengesho, Guverineri Busu bwa Ngwi yibukije akamaro ko kwimakaza ubumwe, kubana neza n’abandi no gukomeza kubaka umubano mwiza hagati y’abaturage. Yashimangiye ko izi ndangagaciro ari zo shingiro ry’amahoro arambye n’iterambere ry’Intara ya Kivu y'Amajyepfo.
Yakomeje asaba abaturage gukomeza gushyira imbere inyungu rusange no gufatanya mu kubaka sosiyete irangwa n’ubwumvikane, cyane cyane muri ibi bihe igihugu gikomeje guhura n’ibibazo by’umutekano muke mu bice bimwe bya RD Congo.
Uyu munsi wa Pasika wabaye umwanya mwiza wo gusangira ubutumwa bw’icyizere, amahoro n’ubumwe, bikomeje gukenerwa cyane mu rwego rwo kugarura ituze n’iterambere rirambye muri Kivu y'Amajyepfo.
