Kinyarwanda
English
Swahili
RDC na M23 bashyize umukono ku masezerano yo kugenzura ihagarikwa ry’imirwano
Mu gihe amahanga akomeje gushakisha igisubizo kirambye ku bibazo by’umutekano mu Burasirazuba bwa Repubulika ya Demokarasi ya Congo (RDC), Guverinoma ya Congo n’umutwe w’inyeshyamba wa AFC/M23 bateye intambwe ikomeye mu rugendo rugana ku mahoro, bashyira umukono ku masezerano yo kugenzura ihagarikwa ry’imirwano.
Uyu muhango wabereye muri Qatar kuri uyu wa Kabiri, witabirwa n’abunzi b’iki gihugu hamwe n’abafatanyabikorwa mpuzamahanga n’abo mu karere. Ni igikorwa gifite icyizere cyo kongera kubaka umubano wizewe hagati ya Guverinoma ya RDC n’imitwe yitwaje intwaro imaze imyaka irenga icumi ikorera mu burasirazuba bw’igihugu.
Mu izina rya Guverinoma ya Congo, Sumbu Sita Mambu, wari uhagarariye Perezida Félix Antoine Tshisekedi, ni we washyize umukono kuri ayo masezerano. Ku ruhande rw’inyeshyamba za AFC/M23, ni René Abandi, umuyobozi mukuru ushinzwe ibiganiro, wasinye.
Ayo masezerano ateganya ishyirwaho ry’urwego rwigenga ruzajya rukurikirana uko ihagarikwa ry’imirwano ryubahirizwa. Uru rwego ruzaba rushinzwe gutanga raporo no kugenzura ibikorwa byose bishobora guhungabanya amahoro, hagamijwe guhagarika burundu imirwano no gushimangira icyizere hagati y’impande zombi.
Abasesenguzi bavuga ko ibi ari iby’agaciro gakomeye mu nzira y’amahoro, ariko bagasaba ko aya masezerano atagomba gusigara mu mpapuro gusa, ahubwo agashyirwa mu bikorwa mu buryo bunoze kandi bwihuse.
