Ku isaha ya saa Kumi z'umugoroba nibwo umukino wa Bugesera FC na Rayon Sports wasubukuwe. Ikipe ya Rayon Sports yatangiye ikora impinduka abarimo Richard Ndayishimiye na Adama Bagayogo bavamo hinjiramo Nshimiyimana Emmanuel na Prince Elenga Kanga.

Ikipe ya Rayon Sports yaje ubona ko irimo gushaka igitego hakiri kare cyane ariko ukabona irimo gukina iri ku gututu cyinshi cyane ari nabyo bituma igenda ikora amakosa yo gutakaza imipira.

Ku munota wa 68, ikipe ya Bugesera FC yazamukanye umupira binyuze ku ruhande rw'ibumoso ariko uyu mupira ntiwagira icyo uvamo gikomeye.

Ku munota wa 70, ikipe ya Rayon Sports yabonye amahirwe yo gutsinda igitego ariko biranga. Ni umupira muremure wari utewe na Ishimwe Fiston ariko Yousou Diagne ashyize ku mutwe umupira uca hanze gato y'izamu.

Ku munota wa 74, ikipe ya Rayon Sports yakomezaga kwataka, yaje kubona uburyo bwo gutsinda igitego ariko uburyo bwari bubonwe, Prince Elenga Kanga ateye umupira uca hanze gato y'izamu.

Habura iminota 7 gusa, rutahizamu Biramahire Abeddy na Serumogo Ally bavuye mu kibuga hinjiramo Adulai Jalo na Assana Nah Innocent. Nyuma y'akanya gato binjiye mu kibuga, Rayon Sports yaje kubona igitego cya mbere gitsinzwe na Bugingo Hakim.

Ni umupira mwiza wari utewe na Assana Nah Innocent umupira usanga aho Bugingo Hakim ahagaze ahita atera umupira, igitego kiba kirabonetse ku munota wa 85.