Ku wa mbere tariki 29 Nzeri 2025, nibwo hasohotse amakuru avuga ko ikipe y'igihugu ya Afurika y'epfo yakuweho amanota 3 ndetse Federasiyo y'iki gihugu icibwa ibihumbi 12,5 by'Amadorari nyuma yo gukinisha umukinnyi utemerewe.

Mu kwezi kwa Gatatu uyu mwaka, nibwo ikipe y'igihugu ya Afurika y'epfo yakinishije umukinnyi wo hagati witwa Teboho Mokoena kandi yujuje amakarita 2 y'umuhondo atamwemerera gukina umukino ukurikiye. Ikipe y'igihugu ya Afurika y'epfo, icyo gihe yari yatsinze Lesotho ibitego 3-0.

Afurika y'epfo yaje kuregwa na Nigeria ndetse na Benin, aba ari byo byatumye iyi kipe ikurwaho amanota yari igeze ku manota 17 ubu ikaba yageze ku manota 14 igaruka ku mwanya wa kabiri.

Ikipe y'igihugu y'u Rwanda Amavubi yaba yongeye kugira amahirwe?

Nyuma yo gutsindwa na Nigeria igitego 1-0, byatumye ikipe y'igihugu y'u Rwanda ndetse n'abakunzi bayo batakaza icyizere muri iyi mikino yo gushaka itike yo gukina igikombe cy'Isi kizaba umwaka utaha wa 2025.

Ntabwo byoroshye ariko urebye icyo imibare ivuga, u Rwanda narwo birashoboka ko rwakitwara neza rukabona itike yo kujya mu gikombe cy'Isi. Mu itsinda kugeza ubu Benin niyo iyoboye uru rutonde n'amanota 14 inganya na Afurika y'epfo ariko ikaba izigamye ibitego 4 indi ikaba izigamye ibitego 3.

Iyi kipe y'igihugu ya Benin izasura ikipe y'igihugu y'u Rwanda kuri Sitade Amahoro. U Rwanda birashoboka ko rwatsinda ikipe y'igihugu ya Benin ariko bikayisaba ko inatsinda ikipe y'igihugu ya Afurika y'epfo ndetse igategereza Nigeria ko nayo hari aho yatakaza kuko banganya amanota 11 kugeza ubu.

Ni imibare wavuga ko ikomeye kuko aya makipe ikipe y'igihugu y'u Rwanda 'Amavubi' isigaje guhura nayo arakomeye ariko mu mupira birashoboka kuko Benin, u Rwanda ruheruka kuyitsinda ibitego 2-1 mu gushaka itike yo gukina igikombe cy'Afurika naho Afurika y'epfo, u Rwanda rukaba rwarayitsinze mu mukino wa mbere muri iyi mikino ibitego 2-0 kuri Sitade mpuzamahanga ya Huye.

Ikipe y'igihugu y'u Rwanda Amavubi umukino izakina mu kiruhuko cy'ikipe y'igihugu ni Benin tariki 10 Ukwakira 2025 ikurikizeho Afurika y'epfo tariki 14 Ukwakira 2025.

Afurika y'epfo yakuweho amanota 3