‎Nyarugenge: Yatawe muri yombi nyuma yo gufatanwa ibiro bine by'urumogi 

Umusore witwa Habiyambere François wo mu Murenge wa Kimisagara mu Karere ka Nyarugenge, yatawe muri yombi nyuma yo gufatanwa ibiro bine by'urumogi.

Mu gitondo cyo ku wa Gatandatu tariki ya 26 Nyakanga 2025, nibwo uyu musore w'imyaka 18 yafatiwe mu Mudugudu wa Nyabugogo mu Kagari ka Kimisagara afite ibiro bine by'urumogi.

‎Polisi ivuga ko uyu Habiyambere avuka mu Murenge wa Nemba mu Karere ka Burera

‎yavuze ko urwo rumogi yarukuye mu Karere ka Burera ndetse hari ahantu yari aruzaniye abandi bantu barucuruza i Remera mu Mujyi wa Kigali.

Kugeza ubu uyu musore afungiwe kuri Sitasiyo ya Polisi ya Kimisagara kugira ngo akorerwe dosiye ajyanwe mu bugenzacyaha ndetse iperereza rikaba rirakomeje kugira ngo hafatwe abandi bakorana.

Polisi ivuga ‎uyu Habamahirwe yafashwe biturutse ku makuru yatanzwe n'abaturage iboneraho gushimira abaturage ku ruhare bagira kugira ngo abantu bafite umugambi wo kwica ubuzima bw'abaturage babaha ibiyobyabwenge bafatwe.

‎Iteka rya minisitiri nimero 001/moh/2019 ryo ku wa 04 Werurwe 2019 rigena urutonde rw’ibiyobyabwenge n’ibyiciro byabyo, rishyira urumogi mu biyobyabwenge bihambaye.

‎Ni mu gihe itegeko nimero 68/2018 ryo ku wa 30 Kanama 2018 riteganya ibyaha n’ibihano muri rusange, ingingo yaryo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

‎Iyo abihamijwe n’urukiko ahanishwa igifungo cya burundu n’ihazabu irenze miliyoni 20 Frw ariko itarenze miliyoni 30 n'amafaranga y'u Rwanda ku byerekeye ibiyobyabwenge bihambaye.