Prince Kiiiz ubusanzwe amazina ye nyakuri yitwa Irasubiza Prince Moïse, akaba asanzwe atunganya ndetse akananononsora amajwi y'indirimbo z'abahanzi mu Rwanda no mu Karere. Kiiiz yakoze ku mishinga y'indirimbo nini nka 'When She's Around' ya Bruce Melodie na Shaggy, 'Amanota' ya Danny Nanone, ndetse akaba ari no gukora kuri EP y'umuhanzi Ray G ugezweho muri Uganda.

Kuri ubu Prince Kiiiz yatangiye gukora indirimbo ze yiririmbiye, ahereye ku yitwa 'Uwadanje' yakorewe muri Situdiyo ya 1:55 AM, igatunganywa na producer Kompressor.

Kiiiz yinjiye mu muziki mu buryo bwo kuririmba, abisangamo aba-producers bagenzi be bagezweho i Kigali, nka Element EleéeH, Loader, Yeweeh, Ayoo Rash, n'abandi.

Uribaza ngo niki kiri gutuma aba-producers bagezweho i Kigali bahitamo kuririmba indirimbo zabo, dore ingingo 3 z'ibanze tugiye kugaruka kuri ibi.

1. Aba-producers bagira ibitekerezo byinshi baba bashaka gushyira hanze

Abakora uyu mwuga wo gutunganya indirimbo z'abahanzi, akenshi usanga banandika indirimbo, bagafasha abahanzi guhimba injyana (melodies), ibi bigatuma rimwe na rimwe agira igitekerezo ko ibyo yifitemo abihurije mu ndirimbo ze byaba byiza kurushaho ndetse bikamugeza kure.

2. Kuririmba bizamura izina (ubwamamare)

Ni kenshi usanga abantu bumva indirimbo y'umuhanzi, bakayikunda ndetse bikishimira ubwiza bwayo ariko ugasanga badaha agaciro producer wayitunganyije.

Producer winjiye mu kuririmba bimufasha kwigarurira amarangamutima y'abakunzi b'umuziki cyane, kuko akenshi abantu bakunda kumva uririmba kuruta cyane uwatunganyije indirimbo. Ibi rero bituma ubwamamare bwe bwiyongera, urugero rwiza hano mu Rwanda ni nka Element EleéeH wahiriwe nabyo.

3. Kongera ikinjira mu mufuka (uburyo bw'amafaranga)

Uyu munsi wa none umuhanzi uririmba iyo yacunzwe neza, umuziki umuha amafaranga ndetse udasize n'abakorana na we. Producer winjiye mu kuririmba aba agomba guhita afungura imbuga zimufasha gucuruza ibihangano bye kandi muri iyi minsi n'imwe mu nzira zo kwinjiza amafaranga.

Nk'umuhanzi watangiye kuririmba kandi aba azabona ibitaramo aririmbamo akishyurwa amafaranga ntabe akiri amwe yishyurwa n'abahanzi gusa, na none hano urugero rwiza ni Element EleéeH usigaye azenguruka ibihugu bitandukanye birimo n'ibyo mu Burayi, agiye kuririmba.

Ibi si bishya kandi kuko no mu bihugu byateye imbere haba mu bukungu ndetse n'uruganda rw'ubuhanzi nka USA, Nigeria, u Bwongereza, na Afurika y'Epfo, usanga abari aba-producers kuri ubu banaririmba.

Element EleéeH ni umwe mu bahiriwe no gutunganya indirimbo ndetse akanaririmba

Prince Kiiiz yatangiye gushyira hanze indirimbo ze yaririmbyemo