Kinyarwanda
English
Swahili
Musanze: Babangamiwe n’abiyise abakaceri babacucura ibyabo
Bamwe mu baturage bo mu Murenge wa Muhoza, Akagari ka Ruhengeri, muri santere y’ubucuruzi izwi ku izina rya Baramujyanye iherereye mu Mudugudu wa Buhoro, bavuga ko babangamiwe n’itsinda ry’insoresore ziyise abakaceri, zibacucura ibyabo mu masaha ya nimugoroba ndetse no mu rukerera.
Aba baturage bavuga kobatewe impungenge n’ibyo bikorwa ndetse bigatuma bamwe batinya gukora imirimo y’ubucuruzi cyangwa ubundi bushabitsi mu masaha y’ijoro.
Umwe mu bacuruzi ukorera muri iyo santere yagize ati: “Iyo tugeze nka saa mbiri cyangwa saa tatu z’ijoro, ntituba tugifite amahoro. Hari abo twabonye bafashwe n’izo nsoresore zibambura amafaranga n’ibindi bintu byabo. dutinya gutaha dutinze, ngo batadukubitira mu nzira cyangwa bakatwambura ayo twakoreye.”
Aba baturage basaba ubuyobozi gukaza ingamba z’umutekano no gukurikirana zimwe mu nsoresore zibyukira mu kabari zinywa inzoga zitujuje ubuziranenge harimo iyitwa Muriture ndetse na kayanga nyirizina iba muri iyi santere ya Baramujyanye.
Umuvugizi wa Polisi mu Ntara y’Amajyaruguru, IP Ignace Ngirabakunzi, yabwiye UkweliTimes, ko inzego z’umutekano zatangiye gukurikirana iki kibazo ndetse hari abantu bane bamaze gufatwa.
Yagize ati “ Byatangiye gukurikiranwa kuko na nimugoroba hari abantu 4 bafatiwe mu mudugudu wa Susa uturanye n'uwo bakekwaho ubujura.”
Aka Karere ka Musanze ni kamwe mu turangwamo inzoga nyinshi zizwi nk’inkorano aho zifite amoko asaga 10 bazita bitewe n’ingaruka zigira kuri bamwe mu bazikoresha.
avuga ko iki kibazo Polisi itari ikizi, kuko nta kirego na kimwe yari yakira. Gusa, avuga ko bagiye guhagurukira iki kibazo no gukaza ibikorwa byo kugenzura kariya gace, cyane cyane mu masaha ya nimugoroba no mu rukerera.
Yagize ati: “Tugiye kugenzura ibyo abaturage bavuga, kandi tuzakaza ibikorwa by’umutekano muri ako gace. Ariko nanone turasaba abaturage kutihanganira ibikorwa nk’ibi, ahubwo bakihutira kubimenyesha inzego z’umutekano kugira ngo dufatanye kubirwanya hakiri kare.”
IP Ngirabakunzi yasabye abaturage gukomeza gutanga amakuru ku gihe, kugira ngo ubufatanye hagati ya Polisi n’abaturage burusheho gutuma umutekano uramba muri ako gace no mu mujyi wa Musanze muri rusange.
Akarere ka Musanze ni kamwe mu turangwamo inzoga nyinshi zizwi nk’inkorano aho zifite amoko asaga 10 bazita bitewe n’ingaruka zigira kuri bamwe mu bazikoresha.
