Kinyarwanda
English
Swahili
Min. Nduhungirehe yaganiriye na mugenzi we wa Ethiopia ku bufatanye n'umutekano w'akarere
Ku ruhande rw’Inama ya 48 y’Inama y’Abaminisitiri b’Ububanyi n’Amahanga b’Umuryango wa Afurika Yunze Ubumwe, Minisitiri w’Ububanyi n’Amahanga w’u Rwanda, Amb. Olivier Nduhungirehe, yagiranye ibiganiro na Minisitiri w’Ububanyi n’Amahanga wa Ethiopia, Amb. Gedion Timothewos Hessebon.
Ibi biganiro byibanze ku mubano mwiza usanzwe hagati y’u Rwanda na Ethiopia, aho impande zombi zashimangiye ubushake bwo gukomeza kuwunoza no kuwagura mu nzego zitandukanye zirimo ubucuruzi, ishoramari, ubwikorezi bwo mu kirere, n’ubufatanye mu bya dipolomasi.
Abaminisitiri bombi banaganiriye ku bibazo by’umutekano n’iterambere mu turere twabo, basangira ibitekerezo ku buryo ibihugu byabo byagira uruhare mu gushimangira amahoro, ituze n’ubufatanye ku rwego rw’akarere no ku mugabane wa Afurika muri rusange.
U Rwanda na Ethiopia bisanzwe bifitanye umubano ukomeye ushingiye ku bufatanye bwa dipolomasi no ku ruhare rugaragara byombi bigira mu bikorwa by’Umuryango wa Afurika Yunze Ubumwe, aho byagiye bishyigikirana mu bikorwa bigamije iterambere rirambye n’amahoro ku mugabane.
Ibi biganiro byabaye mu gihe Abaminisitiri b’Ububanyi n’Amahanga b’ibihugu bigize AU bari bahuriye i Addis Ababa mu nama igamije gutegura no kunoza imyanzuro izagezwa ku Nama y’Abakuru b’Ibihugu na za Guverinoma.
