Uyu Muyobozi Mukuru wa Togo yakiriwe ku Kibuga Mpuzamahanga cy’Indege cya Kigali na Minisitiri w’Ububanyi n’Amahanga w’u Rwanda, Amb. Olivier Nduhungirehe, mu kumwakira kwagaragaje umubano mwiza n’ubufatanye biri hagati y’ibihugu byombi.

Uru ruzinduko rwa Perezida Gnassingbé rwitezwemo ibiganiro bigamije gushimangira umubano wa dipolomasi hagati y’u Rwanda na Togo, by’umwihariko mu nzego zirimo politiki, umutekano, ubufatanye mu bukungu n’iterambere rusange.

Biteganyijwe ko mu minsi azamara mu Rwanda, Perezida Gnassingbé azagirana ibiganiro n’abayobozi bakuru b’igihugu, hagamijwe kurebera hamwe uko umubano w’ibihugu byombi wakomeza gutezwa imbere no gufasha impande zombi mu kugera ku ntego z’iterambere rirambye.

U Rwanda na Togo bisanzwe bifitanye umubano mwiza ushingiye ku bwubahane, ubufatanye n’intego zo guteza imbere amahoro n’iterambere ku Mugabane wa Afurika.