Kinyarwanda
English
M23 yigaruriye umujyi wa Mubi itarwanye ikomeza guhanga amaso Kisangani
Nyuma y’ifatwa rya Centre ya Teritwari ya Masisi, umutwe wa M23 wamaze kwigarurira Centre ya Mubi iri mu birometero 36 uvuye Walikale werekeza Kisangani.
Ku wa 19 Werurwe 2025, abarwanyi bo mu ihuriro AFC/M23 bigaruriye umujyi mukuru wa Teritwari ya Walikale. Walikale ni imwe muri Teritwari zigize Intara ya Kivu ya ruguru, ikaba yari imaze igihe ikigenzurwa n'uruhande rwa Leta ya Kinshasa.
Kuri uyu wa 21 Werurwe, aba barwanyi bigaruriye Centre ya Mubi iherereye ku birometero 36 uva Walikale werekeza mu mujyi wa Kisangani.
Mubi, ni Centre y'ubucuruzi ikomeye cyane cyane mu bucukuzi bw'amabuye y'agaciro yo mu bwoko bwa Gasegeleti.
Amakuru avuga ko M23 yigaruriye iyi Centre itarwanye, kuko ihuriro ry'Ingabo za Leta zikimara kumva umurindi w'abarwanyi ba M23 bahise bahungira Kisangani.
Umujyi wa Kisangani ufatwa nk'umujyi wa gatatu muri DRC, ukaba ari n'umurwa mukuru w’intara ya Tshopo.
Kisangani izwiho kandi no kuba Ingabo za Leta ya Congo ziyifashisha mu kugaba ibitero by’indege z’intambara na za drones ku birindiro byayo ndetse no ku baturage bo mu duce igenzura.
Ibi bije nyuma yuko hari amakuru avuga ko AFC/M23 yaba yarakiriye ubutumire bw'Igihugu cya Qatar ibasaba kubahuza n'uruhande rwa Leta ya Kinshasa.
