Kinyarwanda
English
M23 yatanze ibimenyetso ko yafashe Bukavu
Abarwanyi ba AFC/M23 mu gitondo cyo kuri iki Cyumweru bagiranye ibiganiro n’abaturage b’i Bukavu, banenga ubutegetsi bwa Kinshasa bwahaye imbunda abana bituma bishora mu bikorwa bihungabanya umutekano. Abo barwanyi ba M23 basobanuriye abo baturage ko ari yo mpamvu baje i Bukavu kugira ngo babahe umutekano usesuye. Batumye abaturage kubwira abasirikare ba FARDC na Wazalendo bakihishe mu ngo kwigaragaza.
Ingabo za Leta ya Republika iharanira demokarasi ya Congo (FARDC) mu gitondo cyo kuri iki cyumweru cyatangaje ko ari cyo kigenzura umujyi wa Bukavu, gusa amashusho n’amakuru atangwa n’abatuye i Bukavu avuga ko abarwanyi ba M23 bakomeje kwinjira muri uyu mujyi ari benshi.
Mu ijoro ryo ku wa gatandatu hari amakuru yatangajwe ko abasirikare ba FARDC bagarutse muri Bukavu kuko abarwanyi ba M23 bawuvuyemo.
Mu kugaragaza ko abarwanyi ba M23 bari i Bukavu, umuvugizi wabo wa gisirikare Col Willy Ngoma yagaragaje video n’ifoto y’abarwanyi ba M23 bari ahazwi nko kuri Place de l’Independence hagati mu mujyi wa Bukavu.
Umuvugizi wa gisirikare wa M23, Col Willy Ngoma, abajijwe ku bivugwa n’ingabo za Leta, yasetse. Avuga ko “amashusho yonyine aravuga”.
Andi mashusho atandukanye yerekanye abarwanyi ba M23 bakoze inama ya mbere n’abaturage mu mujyi wa Bukavu kuri stade nto izwi nka ‘Place du 24’.
Muri aya mashusho, Bernard Maheshe Byamungu – umwe mu bakuriye abarwanyi ba M23, yumvikana yizeza abaturage ba Bukavu “umutekano amasaha 24 kuri 24”.
Mu gitondo kuri iki cyumweru, hagati no mu nkengero za Bukavu habonetse imirongo miremire y’abarwanyi ba M23, bivugwa ko uyu mutwe urimo kohereza abandi barwanyi benshi muri uyu mujyi.
