Kinyarwanda
English
Swahili
&format=webp)
Karongi: Umugore w'imyaka 52 wakoze Jenoside yatawe muri yombi
Umugore witwa Uwimana Tarcille w’imyaka 52 wari warahamijwe akanakatirwa n’Inkiko Gacaca kubera kugira uruhare muri Jenoside yakorewe Abatutsi nyuma akaza gutoroka, yatawe muri yombi n’inzego z’umutekano zifatanyije n’iz’ibanze zikorera mu Karere ka Karongi.
Uyu mugore yafatiwe mu Mudugudu wa Ngoma, Akagari ka Gitega Umurenge wa Rugabano ku wa 14 Mata 2026.
Yatawe muri yombi nyuma y’aho umwe mu barokotse Jenoside yakorewe Abatutsi bo muri uwo Murenge yegereye Perezida wa IBUKA , Habakurama Samuel, akamubwira ko Uwimana Tharcille yagarutse mu Murenge wa Rugabano.
Uyu mugore Uwimana Tharcille mu mwaka wa 2007 yakatiwe imyaka 19 n’Urukiko Gacaca rwa Ngoma, akatirwa imyaka 25 n’Urukiko Gacaca rwa Mbogo arongera akatirwa imyaka 25 n’Urukiko Gacaca rwa Gitega.
Yaragaye mu bitero byishe Abatutsi mu Murenge wa Rugabano, nyuma yo gukatirwa n’inkiko Gacaca yahise atorokera mu Ntara y’Iburasirazuba akajya ajya mu Rugabano rimwe na rimwe.
Umuyobozi w’Akarere ka Karongi Wungirije ushinzwe imibereho myiza y’Abaturage, Umuhoza Pascasie yavuze ko nyuma yo kubona ko muri aka Karere hakiri abakatiwe n’Inkiko Gacaca batorotse ubutabera, bashyize imbaraga mu kubashakisha.
Yavuze ko mu 2023/2024 hafashwe 16, mu 2024/2025 hafatwa 72, uyu muri mwaka turimo 2025/2026 bamaze gufata 36 n’uyu wo muri Rugabano wa 37.
