Uyu muhango wabaye ku nshuro ya 144 kuva iri shuri ryashingwa, witabiriwe n’abayobozi bakomeye barimo Col Deo Mutabazi, Umujyanama mu bya gisirikare muri Ambasade y’u Rwanda ku cyicaro gikuru cya Loni. Ni ibirori by’amateka byagaragaje intambwe ikomeye Sous-Lieutenant Uwamahoro yateye mu rugendo rwe mu gisirikare.

US Coast Guard Academy ni rimwe mu bigo bine bikomeye bya gisirikare by’imyitozo ihoraho muri Amerika. ryashinzwe mu 1876 ryitwa Revenue Cutter Service School of Instruction, riza guhindurirwa amazina inshuro ebyiri mbere yo kwitwa izina rizwi kugeza magingo aya.

Buri mwaka, abasoza amasomo muri iri shuri baba bagera hafi kuri 250, bagahabwa imyitozo ikomeye igamije gutegura abayobozi b’inzego z’umutekano zifite ubushobozi buhanitse haba mu bya tekiniki, imyitwarire n’ubushobozi bwo gufata ibyemezo.

Gusoza amasomo mu kigo cya US Coast Guard Academy si ibintu byoroshye. bisaba ubwenge, ubwitange n’indangagaciro zikomeye. Sous-Lieutenant UWAMAHORO yarangije amasomo ahabwa impamyabumenyi mu cyiciro ku kugenzura amakuru no kuyasesengura (operations research and data analysis), ni ubumenyi bugezweho kandi bufatiye runini inzego z’umutekano z’iki gihe.

Intsinzi ye ni ishema ry’u Rwanda, igaragaza ubushobozi n’ubudasa bw’abasirikare b’Abanyarwandakazi mu rwego mpuzamahanga.

Sous-Lieutenant Janet Uwamahoro yabaye urugero rukomeye rw’uko abagore b’Abanyarwanda bashobora kurenga imbibi z’igihugu bagahagararira u Rwanda mu bigo bikomeye ku rwego rw’isi. Ni ishusho y’uburinganire n’ubushobozi igihugu cy’u Rwanda cyashyize imbere mu nzego zose harimo n’ingabo.

Ubuyobozi bwa RDF bwagaragaje ko iyi ntsinzi ari igikorwa cyo kwishimira no gukomeza gukangurira urubyiruko rw’u Rwanda guhigira ibyiza, kugira ubwitange no guharanira kuba indashyikirwa. Janet UWAMAHORO yerekanye ko ari umusirikare waturutse mu gihugu gito ariko ashobora guhangana ku rwego rukomeye igihe afite icyerekezo n’imyitozo ihamye.

Sous-Lieutenant Janet UWAMAHORO yanditse izina rye mu mateka nk’umunyarwandakazi wahagarariye igihugu cye mu ishuri rikomeye rya gisirikare ku isi, ni umwe mu basirikare beza u Rwanda rugize bafite ubumenyi bwihariye by'umwihariko nk’Umunyarwanda kazi.