Kinyarwanda
English
Swahili
Ingabo n’Abapolisi bari bamaze umwaka muri Mozambique bagarutse mu Rwanda
Umugaba Mukuru w’Inkeragutabara, Maj Gen Alex Kagame n’Umuyobozi Mukuru Wungirije wa Polisi y’u Rwanda ushinzwe Ibikorwa (DIGP) Vincent Sano, bakiriye itsinda ry’ingabo n’abapolisi bari bamaze umwaka mu butumwa bwo kugarura amahoro mu Ntara ya Cabo Delgado muri Mozambique.
Ku wa Mbere tariki ya 27 Ukwakira 2025, nibwo izi ngabo n’abapolisi bari bagize iri tsinda ry’Inzego z’Umutekano z’u Rwanda, bari bayobowe na Major General Emmy K Ruvusha, bageze i Kigali.
Maj Gen Alex Kagame yashimiye izi ngabo na Polisi umurava n’ubunyamwuga bagaragaje, abasaba gukomeza kurangwa n’indangagaciro ziboneye.
Inzego z’umutekano z’u Rwanda (RSF) ziri muri Mozambique mu bikorwa byo gutsinsura ibyihebe byari byarayogoje Intara ya Cabo Delgado iri mu Majyaruguru y’icyo gihugu, kuva mu mwaka wa 2021,
Guhera icyo gihe Ingabo z’u Rwanda na Polisi y’u Rwanda batanze umusanzu ukomeye mu kwirukana ibyihebe mu bice bitandukanye, zigarura ubuzima mu bice byose, abari barahunze basubira mu byabo ndetse ku tariki 27 Kanama 2025, u Rwanda na Mozambique byasinyanye amasezerano mashya y’ubufatanye mu by’umutekano n’ubucuruzi.
Iri tsinda ry’ingabo na Polisi rikaba ryasimbuwe n’itsinda riyobowe na Maj Gen Vincent Gatama.
