Inzego z’ubuzima muri Palestine zibivuga ko ibi bitero byaje ari simusiga dore ko byaraswaga umusubirizo hatitawe ku bana cyangwa abakuze.

Umuturahge witwa Abdel-Fattah Abu Mahadi utuye mu ntara ya Gaza, yabwiye itangazamakuru ko iki gitero cyahitanye abagera ku icumi mu gace ka Beit Lahiya harimo n’abo mu muryango we barimo abana be babiri n’umwuzukuru.

Ibitaro byo muri Indonesia bikorera i Beit Lahiya, na byo byatangaje ko  byakiriye iyi mirambo y’abantu bahitanywe n’ibi bitero by’indege.

Mu mujyi wa Gaza,naho hagabwe igitero cyahitanye abantu barindwi barimo abagore babiri, abandi bantu babiri barakomereka bikomeye.

Ibitangazamakuru bitandukanye bikunze gutangaza inkuru zigaruka kuri intambara, bivuga ko Israel ikomeje kugaba imvura y’ibitero mu Ntara ya Gaza buri munsi, kuva amasezerano y’agahenge yari yagiranye n’umutwe wa Hamas yateshwa agaciro ku itariki 18 Werurwe 2025.

Ibi rero bikaba byaratumye  abagera kuri 2 151 barimo abana 732, bamaze guhitanwa n’ibi bitero bya Israel.