Kuri iki cyumweru nibwo irushanwa rya Huye Half Marathon ku nshuro yaryo ya gatatu ryakiniwe mu karere ka Huye mu byiciro by'abagabo n'abagore, irushanwa ryakinwe n’abakinnyi babigize umwuga ndetse n’abandi bari muri Siporo isanzwe.

Iki gikorwa cyahurije hamwe abaturage bo mu turere dutandukanye tugize Intara y’Amajyepfo, harimo abo mu karere ka Huye, Gisagara, Nyamagabe, ndetse n’abari bavuye mu mujyi wa Kigali. Uretse abaturage kandi iri rushanwa ryitabiriwe n’abayobozi bo mu nzego zitandukanye zirimo iza karere n’izo ku rwego rw’igihugu barimo Mayor w’Akarere ka Huye, Mayor wa Gisagara, abayobozi b’inzego z’umutekano mu Ntara y’Amajyepfo ndetse na Minisitiri w’Uburezi wari n’umuyobozi mukuru muri icyo gikorwa.

Abasiganwe ku rwego rw’itiriwe irushanwa Huye Half Marathon mu cyiciro cy’abakobwa n’abahungu basiganwe mu birometero 21, aho mu cyiciro cy’abakobwa uwitwa Mutuyimana Berturde yegukanye intsinzi ahabwa ishimwe ry’amafaranga ibihumbi 400,000 Frw.

Mu kiciro cy’abasore uwatsinze yabaye Ndayisenga Ipimake usanzwe ukinira ikipe ya Polisi y’u Rwanda, na we ahabwa ishimwe ry’amafaranga angana na 400,000 Frw.

Ndayisenga Ipimake wabaye uwa mbere mu bahungu, aganira na UKWELI TIMES yavuze ko byose kubigeraho abikesha imyitozo myinshi, kugira discipline ndetse no kumva inama za batoza.

Yagize ati “Kuba nabashije gutsinda byose mbikesha imyitozo myinshi nkora, kugira discipline ndetse no kumva inama abadutoza batugira buri gihe kugira ngo icyo umuntu aba ahatanira abashe kugitsindira.”

Umusaza w’imyaka 75 wo mu karere ka Gisagara, Masabo Evariste, yatsindiye umwanya wa mbere mu bitabiriye irushanwa bakuze. Ubwo twaganiraga yavuze ko ashimira cyane ubuyobozi bwateguye iryo rushanwa ndetse bugaha n’abakuze amahirwe yo gukora siporo nk’abandi ndetse bakemererwa no kuba batsinda.

Yagize ati “Rwose ndashimira cyane ubuyobozi bwacu budaheza bukemerako natwe dukuze dukora siporo ndetse tukayihemberwa ku batsinze. Ubu negukanye ibihumbi 50,000 Frw ndishimye cyane kandi ndakangurira abaturage bose kujya bayitabira kuko siporo ni nziza cyane ndetse ifasha uyikora kubaho neza.”

Umuyobozi w’Akarere ka Huye Ange Sebutege yavuze ko nubwo iri siganwa rya Huye Half Marathon ryari rimaze imyaka 3 ritaba, byose byari byatewe n’uko ryari ryahuriranye n’icyorezo cya COVID-19 bituma rihagara, agatanga ikizere cy’uko ubu rigiye kuba isiganwa rya buri mwaka ndetse rikanongerwamo imbaraga.

Yagize ati “Ibi byose tubikora tugamije guteza imbere impano za bato ndetse no guteza imbere imibereho myiza y’abaturage kubera ko sport ari ubuzima. Iri siganwa ryari ryarahagaze, urebye ryari rimaze imyaka 3 ritaba kubera ibibazo by’indwara z’ibyorezo byari byugarije igihugu, ariko icyo twishimira ni uko ubu icyo kibazo cyakemutse. Bityo rero iri siganwa rigiye guhora riba buri mwaka ndetse turimo dutekereza n’uko ryajya rihuzwa n’indi mikino kugira ngo rirusheho kuba ryiza cyane.”

Minisitiri w’Uburezi Hon. Joseph Nsengimana yashimiye byimazeyo abitabiriye irushanwa ndetse anatanga ikizere cy’uko hatagize igihinduka ryakongerwamo imbaraga bityo rikajya ritangirizwa mu mashuri abanza mu rwego rwo gutegura abakinnyi beza bashobora no guserukira igihugu.

Yagize ati “Iri siganwa ahanini rigamije guteza imbere imibereho myiza y’abaturage ariko nanone rigafasha abakiri bato kwiteza imbere bifashishije impano zabo. Mwa bibonye ko benshi mu bakinnye ari abanyeshuri, ni byiza ko rero isiganwa nk’iri rishyirwamo imbaraga kandi nk’ubuyobozi turimo tureba uko ryajya ritangirizwa no mu mashuri abanza kugira ngo bakurane uwo muco, ndetse no mu bihe biri imbere wenda tuzabonemo abakinnyi beza bashobora no kuduserukira nk’igihugu.”

Iri siganwa rya Huye Half Marathon ryari rimaze imyaka 3 ritaba kubera icyorezo cya COVID-19 cyari cyugarije u Rwanda muri 2020, ubu rikaba ribaye ku nshuro yaryo ya gatatu ndetse ubuyobozi bw’Akarere ka Huye bukaba butanga ikizere cy’uko rigiye kujya riba buri mwaka nk’uko byari bisanzwe ndetse rikanongezwamo imbaraga binyuze mu kurihuza n’indi mikino.