Uwo mugabo wari umwarimu wari utuye muri komini Karusi mu Ntara ya Gitega, yiyahuye ku wa Kane tariki ya 19 Werurwe 2026 nkuko tubikesha ikinyamakuru Jimbere Magazine cyandikira mu Gihugu cy'u Burundi.

Inshuti z'uwo mwarimu zatangaje ko bazindutse mu gitondo cyo ku wa Kane bagasanga amanitse mu kiziriko gishya. Uwo mugabo yasanzwe yimanitse mu mugozi yaziritse mu giti kiri ahubatse inyubako yahoze yerekanirwamo amafirimi.

Bimwe mu bimenyetso batanga bagaragaza ko yapfuye yiyahuye n'udutebe tubiri basanze turi munsi y'igiti yiyahuriyemo, bakavuga ko bigaragara ko yatwuririyeho ariko akadusunika amaze kugera mu mugozi.

Uwo mwarimu yari asanzwe yigisha mu mashuri abanza mu kigo cya ECOFO Tambi mu gace ka Rugazi ndetse bikavugwa ko yarangwaga no kubana neza n'abantu bose. Uwo mugabo wari ufite abana batatu, umugore we afite uburwayi bwo mutwe, destse bavuga ko ubuzima bw'umugore ari bwo bwatumye yiyahura.

Ubuyobozi bwo mu gace ka Bugenyuzi yaratuyemo buvuga ko mu masaha ya Saa tanu z'ijoro mushiki we wamufashaga kurera abana yabonye ubutumwa bwagiraga buti " Urabeho murabibonera mu mashusho."

Amakuru atangwa n'ubuyobozi, avuga ko hatangiye iperereza kugira ngo hamenyekane intandaro y'urupfu rw'uwo mwarimu.