Ku isaha ya Saa Moya z'ijoro nibwo umukino watangiye. Ni umukino utari woroshye kuko ikipe ya APR FC yabanjemo abakinnyi hafi ya bose usibye Ishimwe Abdoul wasimbuye Clement wagize ikibazo cy'imvune ndetse na Mugisha Gilbert. Gasogi United nayo yazanye intwaro zayo zose muri uyu mukino.

Ikipe ya APR FC muri uyu mukino wabonaga ikina ifite imbaraga nke ariko iza no kubona ibitego 2 byatsinzwe na Nshimiyimana Yunusu ariko abasifuzi baza kuvuga ko hagiye habamo kurarira.

Ikipe ya Gasogi United yabonye amahirwe ku munota wa 35 yo gutsinda igitego ariko Ndikumana Danny wateye ishoti rikomeye umupira ugakurwamo na Ishimwe Abdoul, bahabwa Koroneri itagize igira icyo ibyara.

Igice cya mbere hagati ya APR FC na Gasogi United cyarangiye ikipe zombi zinganyije 0-0. Ni igice ikipe ya APR FC wabonaga irimo gutakaza imipira nyinshi hagati mu kibuga ariko Gasogi United kubyaza umusaruro ayo mahirwe bigakomeza kwanga.

Ku munota wa 74, ikipe ya Gasogi United yabonye igitego cya mbere gitsinzwe na Niyigena Ebenezer. Ni nyuma y'uburyo butatu APR FC yari imaze guhusha batwara umupira abasore ba Gasogi United barimo Ndikumana Danny ahereza Ebenezer atsinda igitego cyiza.

Ikipe ya APR FC yakomeje kugenda ireba uko yakishyura iki gitego yari yatsinzwe ariko umuzamu wa Gasogi United, Ndagijimana Leandre akomeza kubabera ibamba. Gasogi United yakomeje ishaka igitego cya kabiri ariko kubyaza umusaruro amahirwe bikomeza kwanga.

Umukino hagati ya Gasogi United na APR FC warangiye ikipe ya Gasogi United itahanye intsinzi y'igitego kimwe ku busa bwa APR FC. Ni umukino Gasogi United yarushijemo cyane ikipe ya APR FC wabonaga irimo gutakaza imipira cyane.