Kinyarwanda
English
Swahili
NBA: Wembanyama yafashije Spurs gutsinda Knicks mu mukino ukomeye
San Antonio Spurs yatsinze New York Knicks amanota 115-111 mu mukino wa gatatu wa NBA Finals wabereye muri Madison Square Garden mu rukerera ku wa Kabiri tariki 9 Kamena, igabanya ikinyuranyo muri series kuri 2-1.
Victor Wembanyama yayoboye Spurs atsinda amanota 32, mu gihe Stephon Castle yongeyemo 23, bifasha iyi kipe kubona intsinzi yayo ya mbere muri aya makipe yombi ahatanira igikombe cya Shampiyona ya NBA uyu mwaka.
Nyuma yo gutsindirwa imikino ibiri ya mbere i San Antonio, Spurs yinjiye muri uyu mukino ishaka kwirinda kujya inyuma cyane muri series. Yatangiye neza umukino ndetse ibasha guhangana n'igitutu cy'abafana ba Knicks bari buzuye Madison Square Garden.
Knicks yagerageje kwigaranzura umukino mu gice cya kabiri, iyobowe na Jalen Brunson watsinze amanota 32 na OG Anunoby wongeyemo 28, ariko Spurs ikomeza kuba maso mu minota ya nyuma, ibasha kurinda intsinzi yayo.
Uyu mukino ukaba witabiriwe n'ibyamamare byinshi harimo Perezida Donald Trump, JAY-Z,Thimothee Chalamet, DJ Khaled ndetse na Cardi B waje gususurutsa abafana mbere yuko igice cya kabiri gikomeza.
Iyi ntsinzi yahagaritse urugendo rwa Knicks rwari rumaze imikino 13 ya kamarampaka idatsindwa, inongera icyizere cya Spurs cyo gukomeza guhatanira igikombe.
Umutoza wa Spurs, Mitch Johnson, yavuze ko ikipe ye yinjiye muri uyu mukino ifite intego yo gusatira no kwihimura nyuma yo gutsindwa imikino ibiri ibanza.
Umukino wa kane wa NBA Finals uteganyijwe ku wa Gatatu i New York, aho Knicks izaba ishaka kongera ikinyuranyo, mu gihe Spurs izaba ishaka kunganya urugamba.
