Ku wa Kabiri tariki ya 21 Mata 2026, Minisitiri w'Ubutegetsi bw'Igihugu Habimana Dominique yitabiriye inteko y’abaturage mu Murenge wa Ruli mu karere ka Gakenke aganira n'abaturage kuri gahunda zitandukanye zigamije guteza imbere imibereho y'abaturage n'umutekano wabo. 

Muri iyo nteko rusange y'abaturage, haganiriwe ku iterambere ry’abaturage, kubaka umuryango uhamye, umutekano no gusigasira ubumwe bw’Abanyarwanda nkuko tubikesha Minisiteri y'Ubutegetsi bw'Igihugu.

Mbere yo kwakira ibitekerezo n’ibyifuzo by’abaturage, Minisitiri Habimana yabashimiye ibyo bamaze kwigezaho biteza imbere. Yagaragaje ko ibyagezweho ari umusaruro w’ubumwe igihugu cyashyize imbere, abasaba kubukomeraho.

Minisitiri Habimana yagize ati “Tumaze imyaka 32 twishimira ibyiza by'ubumwe kubera imiyoborere myiza. Kuba igihugu cyita ku baturage bose nta vangura, giteza imbere abaturage bose, ibyo tugomba kubisigasira.” Minisitiri Habimana yanagarutse ku mpinduka zabaye mu kwishyura ubwisungane mu kwivuza ndetse ndetse asaba abaturage kwitabira gutanga umusanzu wa mituweli.

 Yagize ati “Umuryango mwiza ni uwita ku kuvuza abawugize. Impinduka ziherutse kuba muri Mituweli zaziye igihe kuko hari hashize imyaka myinshi umusanzu udahinduka, mu gihe serivisi bahabwa kwa muganga zakomeje kwiyongera. Byari ngombwa ko ubushobozi bwa Mituweli buzamuka kugira ngo icyo kigega gikomeze kubavuza neza.”

Mbere yo kwitabira Inteko y'abaturage mu Murenge wa Ruli, Minisitiri w'Ubutegetsi bw'Igihugu yasuye ibikorwa by'iterambere mu karere ka Gakenke asaba abaturage bibumbiye mu makoperative kunoza ibyo bakora.

 Inteko z'abaturage ziterana kabiri mu kwezi, buri wa kabiri w'icyumweru cya mbere cy'ukwezi n'uwa Kabiri w'icyumweru cya gatatu cy'ukwezi.