Kinyarwanda
English
Swahili
Ethiopia irashinja Eritrea guha intwaro inyeshyamba zo muri Amhara
Leta ya Ethiopia yashinje igihugu cya Eritrea guha intwaro inyeshyamba zo mu Karere ka Amhara, ivuga ko iki gikorwa kigamije guhungabanya umutekano w’iki gihugu. Ibi byatangajwe n’Igipolisi cya Ethiopia, kivuga ko cyafashe amasasu agera ku bihumbi 56 yari agenewe inyeshyamba zo mu mutwe wa Fano.
Nk’uko byatangajwe, ayo masasu yafatiwe mu Karere ka Amhara, hanatabwa muri yombi abantu babiri bakekwaho kuyinjiza muri Ethiopia. Polisi ivuga ko iperereza ry’ibanze ryerekanye ko ayo masasu yaturutse muri Eritrea, bikaba byarongereye umwuka mubi hagati y’ibihugu byombi.
Guverinoma ya Eritrea yahakanye ibi birego, ivuga ko ari ibinyoma bya Leta ya Ethiopia bigamije gushaka impamvu zo gutangiza intambara. Minisitiri w’Itangazamakuru muri Eritrea yavuze ko ubutegetsi bwa Addis Ababa burimo gukwirakwiza amakuru atari yo mu nyungu za politiki.
Nubwo Ethiopia na Eritrea byari byarasinye amasezerano y’amahoro mu 2018, umubano w’ibihugu byombi wongeye kuzamo agatotsi.
