Ku munsi wejo hashize tariki 30 Werurwe 2025, ikipe ya Manchester City yatsinze ikipe ya AFC Bournemouth ibitego 2-1 mu mukino wa 1/4 cy'igikombe cya FA Cup.

Ni umukino utaroroheye ikipe ya Manchester City kuko ibitego 2 yatsinze yavuye inyuma kuko yari yabanjwe igitego hakiri kare. Rutahizamu wa Manchester City, Erling Halaand mu gice cya mbere yahushije Penalite ariko aza kwikosora mu gice cya Kabiri ahita atsinda igitego.

Uyu mukinnyi yaje guhita avunika bikomeye ku kuguru kwe kw'imoso ndetse ahita akurwa mu kibuga ajya kwitabwaho kuko ntabwo yashoboraga gukomeza gukina. Halaand ubwo umukino warangiraga yagaragaye yambitswe inkweto zirinda imvune yagize ariko byaje kumenyekana ko azamara hanze y'ikibuga ibyumweru 11 hatagize igihinduka.

Ibi Kandi byemejwe bidasubirwaho n'umutoza wa Manchester City, Pep Guardiola, ubwo umukino warangiraga yemeza ko ari igihe kingana n'ibyumweru 11, ubwo ni amezi 2 n'igice. Ibi bivuze ko Halaand azagaruka mu gikombe cy'isi cy'ama-Club Manchester City izakina guhera tariki 14 kamena 2025.

Ikipe ya Manchester City kugeza ubu ntabwo imerewe neza kuko mu ivuriro ryayo harimo abakinnyi benshi noneho hiyongeyeho na Halaand wafashaga iyi kipe kubona ibitego.

Ikipe ya Manchester City kugeza ubu ntabwo ifite John Stones, Manuel Akanji, Oscar Bobb, Nathane Ake, Erling Braut Halaand ndetse na Rodri utaragaruka neza mu kibuga.

Erling Braut Halaand wari umaze gutsinda ibitego 21 atanga imipira 3 ivamo ibitego muri shampiyona uyu mwaka, asize Manchester City ku mwanya wa 5 ku rutonde rwa shampiyona n'amanota 48 ndetse iyi kipe ye ayigejeje muri 1/2 cya FA Cup.

              Erling Halaand yagize imvune ikomeye