Kinyarwanda
English
DRC: Minisitiri w’Intebe yavuze ku rupfu rw’umupolisi bicyekwa ko yishwe n’abarinzi be
Ibiro bya Minisitiri w’Intebe wa Repubulika Iharanira Demokarasi ya Congo, byatangaje ko Minisitiri Suminwa Judith ababajwe cyane no kubura umugabo witangiye gukorera igihugu cye anihanganisha umuryango we.
Yasabye kandi ubucamanza bwa gisirikare ko bugomba gukora akazi kabwo, yemeza kandi ko iperereza ririmo gukorwa.
Uyu mupolisi wari usanzwe akora akazi k’umutekano wo mu muhanda, yakubiswe n’abagenzi be bashinzwe umutekano wa Minisitri bamuziza ko ngo ataborohereje ngo batambuke mbere.
Mu mashusho yagaragaye nk’uko BBC ibitangaza, yerekana ko ngo abapolisi benshi barimo gukubita umuntu mu muhanda i Kinshasa aho nyuma byaje kuvugwa ko ari uwo mupolisi.
Akimara gukubitwa, yajyanwe kwa muganga mbere y'uko afungwa ariko nyuma biza gutangazwa ko yapfuye mu mpera z'icyumweru gishe.
Igipolisi cya DR Congo kivuga ko uburyo Kabeya yapfuyemo butarasobanuka neza, kandi kikaburira abantu kwirinda amakuru atari yo ku bivugwa kuri uru rupfu.Igipolisi cyemeza ko uwapfuye ari Brigadier Kabeya Fiston wo mu ishami rya polisi ryo mu muhanda i Kinshasa.
Ibinyamakuru muri DR Congo bivuga ko Kabeya yakubiswe ku wa kabiri w'icyumweru gishize ari mu kazi mu muhanda uzwi nka boulevard Mondjiba i Kinshasa, umurwa mukuru wa DR Congo utuwe n'abaturage barenga miliyoni 17.
Minisiteri y'ubutabera ya DR Congo yemeje ko uyu mupolisi yakubiswe na bamwe mu bapolisi bikamuviramo gupfa, ko ababikoze bagomba kubiryozwa.
