Bari barakatiwe igihano cyo kwicwa nyuma yo kugira uruhare  mu kugerageza guhirika ubutegetsi bwa Perezida Tshisekedi  mu mwaka ushize ariko uwo mugambi ukaza kuburizwamo.

Aba banyamerika uko ari batatu aribo Marcel Malanga Malu, Tyler Thompson na Zalman-Polun Benjamin Reuben mu ntangiro z’icyumweru gishize, Perezida Félix Tshisekedi yari yabadohoreye igihano abakuriraho igihano cy'urupfu akigira igifungo cya burundu.

Muri Nzeri (9) mu mwaka wa 2024, nib wo bari barakatiwe igihano cy'urupfu cyemezwa n'ubucamanza bwa gisirikare ku itariki ya 27 Mutarama (1) uyu mwaka.Iki gihano cyaje guhinduka kuba ntasubirwaho  ku itariki ya 9 Werurwe (3).

Itangazo ryo ku wa kabiri ryasohowe n'ibiro bya Perezida Tshisekedi rivuga ko igihano cyabo cyo gufungwa burundu bagiye kugikorera iwabo muri Amerika.

Ni igikorwa cyagizwemo uruhare n'abategetsi ba gisirikare, ab'ubucamanza n'abashinzwe abinjira mu gihugu, ndetse n'abategetsi bo muri ambasade y'Amerika i Kinshasa.

Ni nyuma y'uruzinduko Massad Boulos, umujyanama mukuru wa Perezida w'Amerika Donald Trump kuri Afurika, yagiriye i Kinshasa mu cyumweru gishize akaganira na Perezida Tshisekedi ku ngingo zirimo no kwiga ku masezerano ku bucukuzi bw'amabuye y'agaciro n'ishoramari.

Abantu 51 barimo abo Banyamerika batatu, Umwongereza, Umubiligi n'Umunya-Canada,  ni bo bashinjwe gushaka guhirika ubutegetsi. Baburanishijwe n'urukiko rwa gisirikare, urubanza rwabo runyuzwa  kuri radio na televiziyo by'igihugu.