Ronaldo, wahoze akinira amakipe akomeye nka Real Madrid, Manchester United, na Juventus, ubu ari mu mpera za Kariyeri y'umupira w'amagaru, ariko akomeje kuba umwe mu bakinnyi binjiza amafaranga menshi cyane.

Nyuma yo kwerekeza muri Saudi Arabia mu ikipe ya Al Nassr muri Mutarama 2023, yahise aba umukinnyi wa mbere uhembwa amafaranga menshi mu mateka y’umupira w'amagaru, kuko umushahara we w’umwaka wageze hafi kuri miliyoni 200 z'Amadorari.

Muri Kamena 2025, ubwo yari afite imyaka 40, yasinye amasezerano mashya y’imyaka ibiri na Al Nassr, afite agaciro ka Milliyoni 400 z'Amadorari. Ibi byatumye umutungo wa Cristiano Ronaldo uzamuka ugera kuri miliyari 1.4 z'amadorari, nk’uko bitangazwa na Bloomberg Billionaires Index.

Ntabwo amafaranga Ronaldo abona ayakura mu gukina gusa kuko afite n’andi masoko akuramo amafaranga kandi akomeye.

Amasezerano Ronaldo afite yo kwamamaza uruganda rukora inkweto n'ibyenda rwa Nike afite agaciro kari hafi kuzuza Milliyoni 18 z'Amadorari ku mwaka. Aya masezerano azamara imyaka icumi.

Ubufatanye uyu mugabo afitanye n’ibigo nka Armani na Castrol, byamwongereye amafaranga ajya kuzura Milliyoni 175 z'Amadorari mu mutungo we.

Ronaldo afite umutungo mwinshi mu mitungo itimukanwa hirya no hino ku isi no mu bikorwa by’ubucuruzi mu Burayi, cyane cyane muri Portugal no muri Esipanye.

Nyuma yo kuzuza imitungo ingana gutya, ubu Ronaldo yinjiye mu bakinnyi b’ibihe byose babaye abaherwe. Uyu mugabo yisunze ku barimo Michael Jordan, wahoze akina basketball, wabaye umuherwe binyuze mu masezerano ye na Nike no kugira imigabane muri Charlotte Hornets.

Undi ni Roger Federer, wahoze ari umukinnyi wa tennis, wabaye umuherwe cyane kubera imigabane afite muri kompanyi y’imyambaro ya siporo yiswe On.

Cristiano Ronaldo yongereye amasezerano muri Al Nassr

Ronaldo yaciye agahigo ko kuzuza Milliyari y'Amadorari