Kinyarwanda
English
Col. Pacifique Kayigamba yagizwe umunyamabanga mukuru w’Urwego rw’Ubugenzacyaha (RIB)
Nyakubahwa Perezida wa Repubulika y’u Rwanda, Paul Kagame yagize Col. Pacifique Kayigamba Kabanda Umunyamabanga Mukuru w’Urwego rw’Ubugenzacyaha (RIB), asimbuye Col (Rtd) Jeannot Ruhunga wari umaze imyaka isaga irindwi kuri uwo mwanya.
Ni amakuru yatangajwe ku mugoroba wo kuri uyu wa 26 Werurwe 2025, mu itangazo ryasohowe n'Ibiro bya Minisitiri w'intebe rikubiyemo ibyemezo by'Inama y'Abaminisitiri yayobowe na Perezida wa Repubulika Paul Kagame kuri uyu wa Gatatu.
Col. Pacifique Kabanda wagizwe umunyamabanga mukuru wa RIB yari asanzwe ari Umushinjacyaha Mukuru wa Gisirikare, umwanya yashyizweho muri Gicurasi 2024, mu mpinduka Perezida Kagame akaba n’Umugaba w’Ikirenga w’Ingabo z’u Rwanda yakoze mu nzego zitandukanye za gisirikare.
Ni mu gihe Col (Rtd) Jeannot Ruhunga yari amaze imyaka igera kuri irindwi kuri uyu mwanya, aho yawugiyeho mu mwaka wa 2018.
