Ni igikorwa cyabaye kuri uyu wa Gatanu, tariki ya 29 Ugushyingo 2025, ku birindiro by’Ingabo z’u Rwanda ziherereye muri ako gace ka Socatel M’poko.

Maj Gen Vicent Nyakarundi yagiranye n’ingabo z’u Rwanda, azigezaho ubutumwa bwo kubashimira bwaturutse ku buyobozi bwa RDF.

Yabashimiye akazi keza bakora n’ubunyamwuga berekana mu nshingano zabo. Yaboneyeho kubwira izo ngabo ishusho y’icyerekezo cy’umutekano mu Rwanda no mu karere muri rusange.

Umugaba w’Ingabo zirwanira ku butaka ari muri Repubulika ya Santarafurika mu ruzinduko rw’akazi rugamije gusura ingabo z’u Rwanda ziri mu bikorwa by’ubutumwa bw’amahoro bwa LONI ndetse n’abariyo ku masezerano y’u Rwanda na Santarafurika.

Biteganyijwe ko azitabira umuhango wo gusoza amasomo y’ingabo za Santarafurika (FACA) zahawe amahugurwa n’abasirikare b’u Rwanda, ndetse akazanagirana ibiganiro n’abayobozi ba MINUSCA n’abo mu nzego z’umutekano za FACA.

U Rwanda rufite Ingabo muri Centrafrique ziri mu byiciro bibiri. Harimo iziri mu butumwa bwa Loni, Minusca, n’iziriyo bishingiye ku masezerano yasinywe hagati y’ibihugu.

Iziri mu butumwa bwa Loni niz o zishinzwe kurinda Umukuru w’Igihugu n’ibindi bikorwa remezo bikomeye mu gihugu nk’Ikibuga cy’Indege n’imihanda imwe n’imwe yinjira mu Mujyi wa Bangui iturutse muri Cameroon na Sudani.

Usibye abasirikare, u Rwanda rufite n’Abapolisi muri Centrafrique bari mu butumwa bwa Loni. Na bo bafite inshingano zikomeye harimo no kurinda Minisitiri w’Intebe.