Irushanwa rya BAL ryatangijwe ku mugaragaro mu mwaka wa 2021, rigamije guteza imbere impano z’abakinnyi b’Abanyafurika, gukurura ishoramari mu mukino wa basketball, no gufasha uyu mukino gutera imbere ku rwego rw’umugabane n’isi yose.

Buri mwaka amakipe 12 ahagarariye ibihugu bitandukanye bya Afurika ni yo ahatanira igikombe cya BAL. Ayo makipe abanza gutsinda amarushanwa y’imbere mu gihugu ndetse n’amajonjora ya BAL akorwa ku rwego rw’akarere.

Irushanwa rigabanyijemo ibyiciro bibiri:

Conference Phase: Iki ni igice cy’ibanze cy’irushanwa, aho amakipe ashyirwa mu matsinda atandukanye arimo nka Sahara Conference, Nile Conference, n’andi bitewe n’aho imikino ibera.

Playoffs (Imikino ya nyuma): Amakipe yabaye aya mbere mu matsinda akomeza mu mikino ya 1/4, 1/2, kugeza ku mukino wa nyuma (Finals).

BAL ikinirwa mu mijyi itandukanye ya Afurika kugira ngo irushanwa rirusheho kugera ku bafana benshi baturuka mu bihugu bitandukanye. Muri iyi mijyi harimo: Kigali mu Rwanda, Dakar muri Senegal, Cairo mu Misiri, Rabat muri Maroc ndetse na Pretoria ya South Africa.

Umukino wa nyuma wa BAL ubera mu Rwanda mu nyubako igezweho ya BK Arena, iyi nyubako ikaba yarafashije guteza imbere izina ry’u Rwanda nk’igicumbi cya basketball muri Afurika. Ibi byatumye Kigali imenkwa nka "Capital of African Basketball".

BAL ni byinshi birenze kuba irushanwa. Ni urubuga rufasha abakinnyi b’abanyafurika kumenyekana no gutera imbere ku rwego mpuzamahanga. abenshi bagaragaje impano zabo muri BAL, nyuma baza gukinira amakipe akomeye yo ku isi, harimo no muri NBA.

Muri BAL harimo abatoza n’abakinnyi mpuzamahanga, bamwe muri baba barigeze gukina no gutoza muri NBA n’andi marushanwa y’isi akomeye agiye atandukanye. Ibi bituma irushanwa rirushaho kugira uburambe n’ireme.

Imikino ya BAL izerekanwa na televiziyo mpuzamahanga nka ESPN, Canal+, n’andi mashene, bizatuma abarenga miliyoni nyinshi ku isi yose bazabasha gukurikirana  iyi mikino, bityo Afurika ikarushaho kumvikana mu ruhando rwa siporo mpuzamanga.