Iwobi w'imyaka 28, kuri ubu ni umukinnyi wa Fulham FC ikina muri shampiyona y'icyiciro cya mbere mu Bwongereza 'Premier League', gusa uyu mukinnyi yakiniye n'ikipe ya Arsenal.

Bamwe mu bakinnyi b'umupira w'amaguru bakunze kuba bafite n'izindi mpano zihariye zitari ugukina gusa, Alex Iwobi nawe uretse gukina ruhago ni n'umuraperi.

Mu bikorwa by'umuziki akoresha izina rya '17' ndetse no mu bindi bikorwa bijyanye no gukora ibiganiro ku mbuga nkoranyambaga, ibimenyerwe nka 'Content Creation'.

Alex Iwobi [17], Odumodublvck na Ramz bahuriye mu ndirimbo 'Hop Out' 

Kugeza kuri ubu Iwobi [17 mu muziki] amaze kugira indirimbo zigera kuri eshanu zagiye hanze, harimo nk'iyitwa 'Hop Out' yakoranye n'abareperi babiri, 'Odumodublvck' w'iwabo muri Nigeria na 'Ramz' wo mu Bwongereza.

Uretse Alex Iwobi, hari n'abandi bakinnyi by'umwihariko bakomoka muri Afurika, bagiye bagaragaza ko bahuza umuziki no gukina ruhago barimo nka Rafael Leão ukoresha izina rya 'Way 45' mu muziki, na Memphis Depay.