Ku isaha ya saa Kumi n'ebyiri z'umugoroba zo kuri uyu wa Mbere tariki 10 Ugushyingo 2025, nibwo ikipe ya AS Kigali na Al Hilal Omdurman zakinnye umukino wafashwe nk'uwa gicuti.

Ni umukino utari woroshye ariko benshi bari biteze ikiri buvemo bijyanye nuko benshi baherezaga amahirwe Al Hilal Omdurman kubera ubushobozi n'abakinnyi ifite wavuga ko batari ku rwego rwa Shampiyona y'u Rwanda.

Al Hilal Omdurman n'ubundi ntabwo yazuyaje nkuko benshi bari bayiteze. Iyi kipe yaje gutsinda ibitego 2 hakiri kare cyane kuko abarimo Mohamed Yagub Abdelrhman yatsinze igitego cya mbere ndetse na El Hadj Kane mbere yuko igice cya mbere kirangira.

AS Kigali muri uyu mukino kuba itatsinzwe ibitego byinshi wavuga ko yihagazeho cyane kuko yari irimo kurushwa na Al Hilal Omdurman nubwo nayo yanyuzagamo ikataka cyane ariko kubyaza amahirwe yabonaga bikanga.

Al Hilal Omdurman, ku munota wa 89, yahushije uburyo bukomeye nyuma y'umupira mwiza Akire Temple yabonye ateye ishoti rikomeye umupira uca hejuru y'izamu gato cyane.

Umukino waje kurangira ikipe ya Al Hilal Omdurman itsinze AS Kigali ibitego 2-0. Ni umukino AS Kigali yakinnye neza ariko ubona ko abakinnyi ba Al Hilal Omdurman bari ku rundi rwego gutsinda byari bigoranye cyane.

AMAFOTO: Shimirwa Eddy