Kuri uyu wa 28 Werurwe 2025, muri Hotel Serena iri i Goma muri Kivu ya Ruguru habereye inama idasanzwe yafatiwemo imyanzuro itandukanye. Ku ruhande rwa AFC/M23  inama yitabiriwe na Generale Major Sultan Emmanuel Makenga, umugaba mukuru w'Igisirikare cya AFC/M23 (ARC)  akaba yaherekejwe na Brigadier General Byamungu na Guverineri w'Intara ya Kivu ya Ruguru, Col. Bahati Musanga Erasto.

Ni mu gihe ku ruhande rwa SADC inama yitabiriwe na Professeur Kula I. Theletsane, umuyobozi ushinzwe igisirikare na Politiki muri SADC.

General Rudzani Maphwanya, umuyobozi w'Ingabo za Afurika y'Epfo, akaba kandi yari kumwe na Lieutenant General C. Zyeele , komanda w'Ingabo za Zambiya. 

Ku ruhande rwa SADC kandi, iyi nama yitabiriwe na Major General Saiford Kalisha, akaba yari ahagarariye ubuyobozi bw'Ingabo za Malawi, ndetse na Major  General Ibrahim Michael Mhona, wari uhagarariye umuyobozi w'Igisirikare cya Tanzaniya.

Ni inama yasinyiwemo amasezerano atandukanye, ahanini akaba yari ashingiye ku bufatanye mu itaha ry'abasirikare ba SADC bamaze igihe gisaga umwaka mu butumwa bwa (SAMIDRC) mu  Burasirazuba bwa Repuburika Iharanira Demokarasi ya Congo.

Impande zombi  zemeranyijwe ku guhagarika imirwano,  ndetse no gucyura nta mananiza ingabo za SAMIDRC.

AFC/M23 yemeye kugenzura ibikorwa by'imyiteguro yo gutaha kw'Ingabo za SADC kandi mu bwisanzure.

Impande zombi zemeranyijwe gushyiraho akanama gahuriweho kaziga ku ifungurwa ry'ikibuga cy'Indege cya Goma, kikaba ari nacyo kizifashishwa izi ngabo zitaha.

SADC yemeye kuzagira uruhare mu isanwa cy'ikibuga cy'Indege cya Goma kugira ngo izabe ari cyo ikoresha icyura ingabo zayo ndetse n'intwaro zabo, ariko izo bafite za FARDC bakazazisiga mu maboko ya AFC/M23.