Umuryango mpuzamahanga witwa Save the Children watangaje ko muri uyu mwaka wa 2025, ku mugabane wa Aziya impinja 1.100.000 zavukiye mu nkambi z'impunzi n'ahacumbikiwe abibasiwe n'ibiza byatewe n'imihindagurikire y'ibihe.

Raporo ya Save the Children igaragaza ko umugabane wa Aziya muri uyu mwaka wibasiwe n'imyuzure, inkubi y'umuyaga, amapfa n'iriduka ry'imisozi byatumye abaturage babura ibiribwa bihagije ndetse ntibyorohere abarimo ababyeyi batwite kubona iby'ibanze bakeneye.

Mu bihugu byibasiwe n'ibyo biza bikomeye harimo, Afghanistan, Bangladesh, Indonesia, Laos, Myanmar na Sri Lanka. Muri ibyo bihugu ibikorwa remezo birimo amavuriro byarangiritse kubera ibiza.

Ibikorwa remezo birimo inyubako zari zituwemo byarangiritse, byatumye bamwe mu baturage barimo abagore batwite inda z'imvutsi bacumbikirwa mu nkambi zitarimo n'ibikoresho bihagije.

Save the Children kandi yatangaje ko abana barenga miriyoni zirindwi ku Isi yose bavukiye ahantu hatari ibikoresho by'ibanze mu kurengera ubuzima bw'umwana n'umubyeyi. Nibura abana 23.000, nibo bavukiraga aho hantu ku munsi ni ukuvuga abana 7 mu 10 bavukiraga ahabaye ibiza cyangwa ahari intambara byatumye ababyeyi babo babyara bahunga imidugararo.