Kinyarwanda
English
Swahili
Ingabo z’u Rwanda muri Santarafurika zubakiye abaturage ifuru ibafasha kwihangira imirimo
Ku wa 31 Ukuboza 2025, Ingabo z’u Rwanda ziri mu itsinda rya Battle Group VII, rikorera mu butumwa bw’amahoro bw’Umuryango w’Abibumbye bwo kugarura amahoro muri Repubulika ya Santarafurika (MINUSCA), zashyikirije abaturage b’umudugudu wa Gobolo, uherereye mu gace ka Bria, mu Ntara ya Haute-Kotto, ifuru yubatswe igamije kubafasha gutunganya imigati no kwiteza imbere mu bukungu.
Iyi furu yubatswe ku bufatanye n’Ishami rya MINUSCA rishinzwe kwambura intwaro no gusubiza mu buzima busanzwe abahoze mu mitwe yitwaza intwaro (DDR), mu rwego rwo guteza imbere imibereho myiza y’abaturage no gushimangira amahoro arambye.
Umuhango wo gushyikiriza abaturage iyi furu witabiriwe n’abayobozi batandukanye barimo Guverineri w’Intara ya Haute-Kotto, Bwana Evariste Thierry, abayobozi b’inzego z’ibanze, hamwe n’abaturage b’umudugudu wa Gobolo bishimiye iki gikorwa.
Abaturage bagaragaje ko iyi furu igiye kubafasha kubona imirimo, kongera umusaruro w’imigati no guteza imbere ubufatanye n’imibereho myiza y’abahoze mu mitwe yitwaza intwaro n’abandi baturage, bityo ikaba igikorwa gifite uruhare rukomeye mu kubaka amahoro n’iterambere rirambye muri aka gace.
Iki gikorwa kigaragaza uruhare rukomeje rw’Ingabo z’u Rwanda mu gufasha abaturage, atari mu gucunga umutekano gusa, ahubwo no mu guteza imbere imibereho myiza n’iterambere ry’abaturage muri Repubulika ya Santarafurika.
