Ku cyumweru tariki 11 Mutarama 2026, nibwo ikipe ya Real Madrid na FC Barcelona zakinnye umukino wa nyuma wa Super Cup urangira FC Barcelona igitwaye nyuma yo gutsinda ibitego 3-2.

Nyuma yo kwegukana iki gikombe cya Kabiri cyikurikiranya FC Barcelona itsinda Real Madrid, ntabwo abakinnyi b'iyi kipe ifite Champions League 15, bigeze bemera ko iki gikombe gikomeye ku buryo ari cyo bareba mu mwaka w'imikino.

Umwe mu babivuze ho ni rutahizamu Kylian Mbappé, watangaje ko Super Cup atari igikombe nka Real Madrid baba bareba mu mwaka w'imikino rero bidakwiye kubatera ikibazo ngo kuko bakibuze.

Umukinnyi wakiniye Real Madrid, Toni Kroos mu Kiganiro n'itangazamakuru yakoze ku munsi w'ejo hashize tariki 14 Mutarama 2026, yatangaje ko FC Barcelona gutwara iki gikombe ari byiza gusa kuri Champions League ho ntacyo yayizeza.

Yagize ati “Barcelona bishimiye cyane gutwara Super Cup ya Espagne, ariko ubu hagiye gutangira Champions League, aho Barcelona izahura n’amakipe akomeye ku rwego rwo hejuru. Sintekereza ko bazatwara igikombe na kimwe ku rwego mpuzamahanga.”

Uyu mukinnyi yakomeje agira ati “Ndacyafite igitekerezo kimwe nk’icy’umwaka ushize. Uko mbibona, Barcelona ntizatwara Champions League. Niba unaniwe kandi ntuhindure uburyo ukinamo, birigaragaza cyane uko uba ufunguye kandi byoroha ko bagutsinda.”

Ikipe ya FC Barcelona nyuma yo kwegukana Super Cup ya Espagne, igiye gukomeza kwitegura imikino ya Copa del Rey aho iratangirira ku mukino ifitanye na Racing uteganyijwe kuri uyu wa Kane tariki 15 Mutarama 2026.

Toni Kroos yatangaje ko FC Barcelona itatwara Champions League