Amakuru yatanzwe n’itangazamakuru rya Brésil yemeza ko uyu mupolitiki yoherejwe kuri polisi ikorera muri kilometero umunani uvuye mu ngoro y’umukuru w’igihugu.
Uyu mugabo Bolsonaro yabaye Perezida wa Brésil kuva mu 2019 kugeza mu 2022, atsindwa amatora, ahita ashaka guhirika ubutegetsi ariko ntibyamuhira.

Kugez aubu ntihamenyekanye icyatumye urukiko rutegeka ko afungwa ariko amakuru aturuka mu gihugu yavuze ko byakozwe mu nyungu z’ituze rya rubanda.

Umwe mu bunganira Bolsonaro witwa Celso Vilardi, yahamirije AFP kuri uyu wa 22 Ugushyingo ko umukiliya we “yafunzwe, ariko sinzi impamvu.”

Muri Nzeri 2025, Bolsonaro yahanishijwe igifungo cy’imyaka 27 n’amezi atatu ahamijwe ibyaha byo kugerageza guhirika ubutegetsi bwari bwegukanywe na Luiz Inácio Lula da Silva mu matora ya 2022.

Gusa urukiko ntirwahise rutegeka ko afungwa kubera inzira z’ubutabera zirimo n’ubujurire zari zitararangira  ndetse hari andi makuru avuga ko ifungwa rya Bolsonaro ridafitanye isano n’ibyaha yahamijwe byo gushaka guhirika ubutegetsi.