Umuraperi Bushali yanditse ku rubuga rwa WhatsApp ahajya ubutumwa bw'amasaha 24 (WhatsApp status) no kuri Instagram ahatangirwa ubutumwa bw'amasaha 24 ko yahemukiwe n'umugore witwa Mukeshimana Chantal ukuriye urugaga rw'abikorera (PSF) mu karere ka Nyamasheke. 

Nubwo yanditse amagambo arimo umujinya mwinshi ko agiye gushyira hanze ibya Mukeshimana Chantal. Ibi byatewe n'uko Bushali yari yarasinye amasezerano yo kujya kuririmbira I Nyamasheke mu imurikagurisha. 

Bushali yasinye kwishyurwa 500,000 Frw ariko agahabwa igice cya 250,000 Frw. Mu masezerano UKWELITIMES yabonye harimo ingingo zagonze Bushali.

Izo ngingo zivuga ko yagombaga kwishyura inshuro ebyiri ibiri mu masezerano mu gihe yakwica ibikubiye muri ayo masezerano. No ku ruhande rwa PSF iyo bica amasezerano bari gukuba kabiri kuko biranditse mu masezerano.

 Nibyo koko yishe amasezerano kuko ku wa 30 Kanama 2025 yagombaga kujya kuririmba I Nyamasheke ndetse yasabwa kugera ku rubyiniro saa kumi. Byabaye ngombwa ko bashaka Fireman aziba icyuho cya Bushali. 

Burumvikana ko icyo ari igihombo cyo kwishyura undi muhanzi.

Bushali yashyize hanze integuza ko azaririmba mu imurikagurisha ry'i Musanze. Niko byagenze kuko hari amashusho ari kuririmbira I Musanze.

Bukeye rero ku wa 31 Kanama 2025 yasabye ko yajya kuririmba I Nyamasheke. Wibukeko mu masezerano yashyizeho umukono yari yemeye kuririmba ku wa 30 Kanama 2025.

Ibyo yasinye yari yamaze kubirengaho kandi harimo ingingo imugonga yo kwishyura inshuro ebyiri ayo yahawe. 

Iyo haza kubahirizwa ibyo basinye ku mpande zombi, Bushali yari kwishyura 500,000 Frw kuko yari yahawe 250,000 Frw mbere (avance).

Habayeho kuganira baramwihorera aza kuririmba ku wa 31 Kanama 2025. Nabwo yasabwe kuhagera saa kumi z'umugoroba ariko yishe isaha ahagera saa moya z'ijoro. Isaha yahawe nayo yarayishe.

Baraganiriye bemeranya ko ahabwa 150,000 Frw agakatwa 100,000 Frw bitewe nuko mu byo yasinyiye nta na kimwe yubahirije.

Ku ruhande rwa PSF yahaye akazi Bushali nta masezerano yarenzeho . Ku ruhande rwa Bushali yariye habiri I Musanze ashaka kwiyunyuguza ku ya Nyamasheke ariko asanga inyandiko irahari kandi yayishyizeho umukono.

Kuri iki kibazo rero Bushali akeneye gusaba imbabazi Chantal Mukeshimana kuko nta sezerano yishe. Kuri Bushali nawe akwiriye kuganirizwa akamenya ko isezerano ari umwenda (la promesse est une dette).

Icyakora iminsi y'itangira ry'amashuri iregereje ku buryo Bushali yari yayabariye uko ari miliyoni imwe ku buryo ku rundi ruhande wakumva icyamuteye kujya gupagasa akirengagiza ibyanditswe mu masezerano. Bushali ni umubyeyi w'abana babiri, akaba azwiho kubahiriza gahunda mu bitaramo.