Ku wa 7 Ugushyingo 2025 Urukiko rwisumbuye rwa Nyarugenge ruraburanisha dosiye irimo abantu barindwi barimo abayobozi batatu bari mu nzego zo hejuru mu kigo cy'igihugu gishinzwe Mine, gaze na peteroli (RMB) na ba rwiyemezamirimo bane.

Abo bakozi ba RMB ni KANYANGIRA John, NIYONGABO Richard na RWOMUSHANA KAREMERA Augustin, naho abacukuzi b’amabuye y’agaciro bo ni RUBAZINDA Callixte, KWIZERA Jean Bosco,NDAGIJIMANA Philippe na HAKIZINSHUTI Jonas.

Ibyaha bakurikiranyweho ibyaha bine

Gusaba no kwakira indonke, icyaha giteganywa kandi kigahanishwa ingingo ya 4 y’Itegeko No 54/2018 ryo kuwa 13/08/2018 ryerekeye kurwanya ruswa.

Icyaha cyo kudasobanura inkomoko y’umutungo, icyaha giteganywa kandi kigahanishwa ingingo ya 9 y’Itegeko N°54/2018 ryo kuwa 13/08/2018 ryerekeye kurwanya ruswa. 

Icyaha cyo gufata icyemezo gishingiye ku itonesha, ubucuti, icyaha giteganywa kandi kigahanishwa ingingo ya 8 y’Itegeko N°54/2018 ryo kuwa 13/08/2018 ryerekeye kurwanya ruswa n'icyaha cyo gutanga indonke, icyaha giteganywa kandi kigahanishwa ingingo ya 4 y'itegeko No 54/2018 ryo kuwa 13/08/2018 ryerekeye kurwanya ruswa.

Mu cyumba cy'urukiko hari kubera imanza nyinshi ku buryo abo bantu bategereje urubanza mu mizi rw'abo barindwi.

 Bafungiye mu igororero rya Nyarugenge riri I Mageragere nyuma yo guhabwa iminsi 30 y'agateganyo bitewe n'uko urukiko rwibanze rwa Kicukiro rwasanze hari impamvu zikomeye, ibyagezweho no kuba baramutse bahamwe n'ibyaha bahanishwa igifungo kirengeje imyaka ibiri.