Imikino ya nyuma mu Umurenge Kagame cup mu Karere ka Rwamagana yabereye mu kagari ka Nyarusange mu Murenge wa Muhazi ku kibuga cya AEE Umuryango Nyafurika w'Ivugabutumwa ) ishami rya Rwamagana.

Umukino wa nyuma mu bagore wahuje ikipe y'Umurenge wa Fumbwe na Nyakaliro. Uwo mukino warangiye Umurenge wa Nyakaliro utsinze kuri penaliti 4 Kuri 3 z'Umurenge wa Fumbwe.  Mu bagabo ikipe y'umurenge wa Gishari yegukanye Igikombe cyayo cya Kane mu Umurenge Kagame Cup itsinze Rubona igitego 1 ku busa. Aya makipe yombi akaba ari inshuro ya gatatu zikurikiranya ahuriye ku mukino wa nyuma. Izo nshuro zose Umurenge wa Gishari niwo wegukanaga Igikombe.

Umuyobozi w'Akarere ka Rwamagana Mbonyumuvunyi Radjab yashimiye abakinnyi, abaturage n'abafatanyabikorwa ndetse anabwira abaturage bitabiriye iyo mikino ko amarushanwa y'Umurenge Kagame Cup, yitiriwe Umukuru w'Igihugu, akaba agamije kwimakaza imiyoborere myiza, guteza imbere impano n'umuco wo guhiga no kurushanwa.

Muri  aya marushanwa habaye Imikino y'intoki muri Basketball na volleyball, gusiganwa ku magare n'Imikino ngororamubiri. Amakipe yatwaye Ibikombe niyo azahagararira Akarere ka Rwamagana ku rwego rw'Intara y'Iburasirazuba mu marushanwa y'Umurenge Kagame cup.