Ubu bushakashatsi bwakozwe hifashishijwe inyandiko z’ubumenyi n’isuzuma ry’ipimwa ry’uburebure bw’inyanja, aho ibimenyetso 90% byagaragaje ko inyanja irimo kuzamuka ku buryo budasanzwe bitewe ahanini n’ingaruka z’ibiza bikomeje kubaho hirya no hino ku isi.

Abakoze ubwo bushakashatsi bavuga ko hari ingaruka zikomeye zishobora kuba ku batuye isi mu gihe inyanja yakomeza kuzamuka cyane bitewe ahanini n'amazi y’imyuzure aterwa n’imihindagurikire y’ibihe ayongera.

Umwarimu akaba n’umushakashatsi muri Kaminuza ya Wageningen mu Buholandi avuga ko igitera ibyo byose ari uko inkombe zimwe na zimwe z’inyanja zishobora kuba zarataye ubushobozi zari zifite bwo kwihanganira imihindagurikire y’ibihe bigatera igice kinini cy’inkombe y’inyanja kwibasirwa n’amazi.

Dr. Katharina Seeger, umwarimu muri Kaminuza ya Padua, avuga ko we abona igitera ibyo ari imiterere y’inyanja ubwayo, akavuga ko inyanja isa n’iri ku musozi ugenda uzamuka bitewe n’imitingito y’ingufu ziba munsi y’ubutaka.

Ubu bushakashatsi bwerekanye kandi ko mu gihe inyanja yakomeza kuzamuka ku kigero nk’icyo iriho ubu, bishobora gutera ubutaka bw’isi kwibira ku kigero cya 37%, bigatera isi kuzura amazi y’inyanja, ibintu byagira ingaruka ku barenga miliyoni 132.

Ubu bushakashatsi buje nyuma ya raporo nshya y’umuryango wa UNESCO yaherukaga gusohoka nayo yagaragazaga ko amazi y’inyanja agenda yiyongera mu nyanja kubera imihindagurikire y’ibihe mu gihe ubutaka bwo bugenda bwibira mu nda y’isi buhoro buhoro.

Ibi bibaye mu gihe abashakashatsi batandukanye ku isi bakomeje ubushakashatsi bwimbitse ku mikorere y’inyanja n’ubutaka mu rwego rwo kumenya imiterere yabyo ndetse ibisubizo bibonetse bifashe benshi gufata ingamba zo guhangana n’ingaruka z’imihindagurikire y’ikirere.