Kinyarwanda
English
Swahili
U Rwanda na Algérie biyemeje gukomeza gushimangira umubano n’ubufatanye
Ku ruhande rw’inama mpuzamahanga yiga ku byaha byakozwe n’ubukoloni muri Afurika, Minisitiri w’Ububanyi n’amahanga w’u Rwanda, Amb. Olivier Nduhungirehe, yagiranye ibiganiro na mugenzi we wa Algérie, Ahmed Attaf, ushinzwe Ububanyi n’Amahanga n’Abanya-Algérie baba mu mahanga.
Mu biganiro byabo, aba ba minisitiri bagarutse ku gukomeza guteza imbere ubufatanye hagati y’ibihugu byombi, haba mu rwego rw’ubukungu, ububanyi n’amahanga mu bya Dipolomasi n’indi mishinga y’iterambere ibihugu byombi bishobora gufatanya.
Minisitiri Nduhungirehe yashimangiye ko u Rwanda rwifuza kurushaho kubaka umubano ukomeye na Algérie, ndetse no gushakira hamwe amahirwe mashya y’ubufatanye ashobora guteza imbere abaturage b’ibihugu byombi.
Ku rundi ruhande, Minisitiri Ahmed Attaf na we yagaragaje ko igihugu cye gifite ubushake bwo gukomeza guteza imbere umubano na Kigali, by’umwihariko mu nzego z’ubuyobozi, ubucuruzi n’indi mishanga ishobora gufasha Afurika mu iterambere rirambye.
Ibi biganiro biri mu murongo mugari wo gushimangira ubufatanye hagati y’ibihugu bya Afurika, cyane cyane muri iki gihe umuryango nyafurika ukomeje gushakira hamwe ibisubizo by’impano n’ingaruka z’ubukoloni bwamaze imyaka myinshi bukoma mu nkokora iterambere ry’umugabane.
