Kinyarwanda
English
Swahili
Sitade izakinirwaho umukino wa nyuma wa Euro 2028 yamenyekanye
Impuzamashyirahamwe y'umupira w'amagaru ku mugabane w'i Burayi, yamaze gutangaza Sitade izakinirwaho umukino wa nyuma wa Euro izaba muri 2028, izabera mu bwami bw'u Bwongereza.
Kuri uyu wa Kane tariki 13 Ugushyingo 2025, nibwo hatangajwe ko Cardiff Stadium, izakinirwaho umukino ufungura wa EURO 2028, mu gihe Wembley Stadium ibarizwa mu mujyi wa London izakira imikino ya kimwe cya kabiri ndetse n’umukino wa nyuma.
Ibibuga icyenda byo mu Bwongereza na Ireland, bizakira imikino y’iri rushanwa rizahuza amakipe 24, rizatangira ku wa 9 Kamena 2028, kuri National Stadium of Wales. Ibibuga byose bikoreshwa mu marushanwa ya UEFA bizaba byakuweho ibirango by’abaterankunga.
Umurwa mukuru wa Ireland, Dublin, uzakira imikino irindwi, irimo itanu yo mu matsinda n’umwe wa 1/4 cy’irangiza. Hampden Park i Glasgow yo izakira imikino itandatu, irimo ine yo mu matsinda n’umwe wa 1/4 cy’irangiza. Nibaramuka babashije kubona itike, Ireland, Scotland bazahakinira imikino yose yo mu matsinda yabo kuri sitade zabo nk’igihugu.
Ubwongereza buzakira umukino umwe wo mu itsinda i Manchester. Wembley stadium nta mukino izakira wo muri 1/8, ariko izakira umukino wa 1/4 cy’irangiza, ndetse n’imikino yombi ya kimwe cya kabiri n’umukino wa nyuma uzaba ku itariki 9 Nyakanga 2028.
Mu mwaka wa 2021, Wembley yari yakiriye imikino ya kimwe cya kabiri n’uwa nyuma wa EURO 2020, irushanwa ryasubitswe kandi rigabanyirizwa abitabiriye kubera COVID-19. Ubwongereza bwatsinzwe n’u Butaliyani kuri penaliti. Mu 1996, Ubwongereza nabwo bwari bwakiriye EURO 1996, ariko busezererwa muri kimwe cya kabiri n'u Budage, nabwo kuri penaliti.
Irushanwa rya 2028 rizaba ari ubwa kane EURO ikinwe n’amakipe 24. Tombola y’amatsinda yo gushaka itike izabera i Belfast mu majyaruguru ya Ireland mu Ukuboza 2027.
UEFA yemeje gahunda y’imikino kuri uyu wa Gatatu mu muhango wabereye mu murwa mukuru w’u Bwongereza, London. Hateganyijwe gutangwa amatike arenga miliyoni eshatu (3,000,000) kuri EURO 2028, nubwo UEFA itaratangaza ibisobanuro birambuye kuri byo.
U Budage nibwo bwari bwakiriye irushanwa riheruka, EURO 2024, aho Espagne yegukanye igikombe cya kane cy’u Burayi. Icyo gihe u Bwongereza bwarangije irushanwa ari ubwa kabiri.
Wembley stadium niyo izakinirwaho umukino wa nyuma wa Euro ya 2028
