Mu murenge wa Mudende, niho hatagirijwe ku mugaragaro "Ishuri ry'abayobozi", muri uwo murenge hahuriye abayobozi mu byiciro bitandukanye byo mu mirenge ya Bugeshi na Mudende.

Itangizwa ry'ishuri ry'abayobozi ryanitabiriwe n'abagize Inteko Ishinga Amategeko barimo Hon Depite Rubagumya Furaha Emma, wasabye abayobozi gukemura ibibazo byabo n’iby’abaturage, gutanga ibisubizo no kuba intangarugero. Yibukije abayobozi ko umuyobozi mwiza agaragazwa n’ibikorwa bye n’igisubizo atanga ku bibazo bihari.

Mu ijambo rya Guverineri w'Intara y'Iburengerazuba, Ntibitura Jean Bosco, yibukije ko ubuyobozi ari inshingano itangirira ku muntu ku giti cye, agaharanira impinduka, iterambere n’imibereho myiza y’abo ayobora, ndetse akazamura imyumvire yabo.

Guverineri w'Intara y'Uburengerazuba Ntibitura  Jean Bosco, ubwo yaganiraga n'itangazamakuru, yanagaragaje ko buri wese utanga serivisi akwiye kuzinoza.

Yagize ati "Ntabwo ari ikibazo cy'iyi Ntara by'umwihariko, ni ikibazo muri rusange, waba umucuruzi, waba umuyobozi w'Umurenge, waba uw'Umudugudu, urwo rwego waba uyobora rwose, abaturage bagomba kubona serivisi uko bazikeneye."

Guverineri Ntibitura yakomeje agira ati " Abaturage nabo tukabasaba ko ibyo babwirwa n'abayobozi bibaganisha ku iterambere bagomba kubyumva kandi aho batanogewe na serivisi bakabimenyesha umuyobozi w'urwego Rwisumbuye kugira ngo dukumire ko imitangire mibi ya serivisi zihabwa umuturage."

Ishuri ry'abayobozi ni gahunda y'umwihariko y'Intara y'Iburengerazuba izafasha abatuye iyi Ntara kunogerwa n'imiyoborere no gukemurirwa ibibazo badasiragijwe. Iyi gahunda yatangiye mu karere ka Rubavu hari utundi turere yatangijwemo ndetse ikazagera no mu turere dusigaye .