Mu gitondo cyo kuri uyu wa gatanu tariki 16 Gicurasi 2025, ikipe ya Rayon Sports yabyutse isaba ishyirahamwe ry’umupira w’amaguru hano mu Rwanda FERWAFA ko yatanga abasifuzi mpuzamahanga muri iyi mikino isigaye kugirango shampiyona irangire.

Mu ibaruwa iyi kipe yashyize ahagaragara yerekenye abasifuzi bakoze amakosa mu  mikino ishize ubona ko Rayon Sports itarimo kwifuza bamwe muri aba.

Abasifuzi barimo Eric Dushimimana, Eric Mugabo ndetse na Munyangoga Apollinaire basifuriye Vision FC ndetse n’abarimo Ngaboyisonga Patrick, Maniragaba Valery na Ruhumuriza Justin bamaze iminsi bitwara nabi mu mikino iyi kipe yakinnye.

Itsinda rimwe muri aba Rayon Sports yagaragaje, bisa nkaho ishobora kuba yabonye harimo abazayobora umukino uzabahuza na Bugesera FC.

Rayon Sports yaje kubwira FERWAFA ko igomba kurebera kuri CAF cyangwa n’andi marushanwa akomeye kumugabane w’i burayi kuko mu kugena abasifuzi birinda ikibazo icyo ari cyo cyose cyatuma ikipe yitwara nabi bidakwiye.

Muri shampiyona y’u Rwanda hamaze iminsi hagaragara ko nta musifuzi ukomeye urimo guhabwa gusifura iyi mikino ikomeye ndetse no kuri iyi mikino y’umunsi wa 28 wa shampiyona, byitezwe ko nta musifuzi mpuzamahanga uzahabwa imwe muri aya makipe ahanganiye igikombe.

Kuri uyu wa gatandatu tariki 17 Gicurasi 2025, nibwo Rayon Sports izaba ikina na Bugesera FC naho APR FC izaba ikina na Gorilla FC kuri Kigali Pele Stadium. Rayon Sports iri ku mwanya wa mbere n’amanota 59 naho APR FC iri ku mwanya wa kabiri n’amanota 58.