Iyi ntsinzi yaturutse mu mukino wabaye kuri uyu wa 05 Gicurasi 2026, yayihesheje gukomeza ku giteranyo cy’ibitego 2-1, nyuma y’uko amakipe yombi yari yanganyije 1-1 mu mukino ubanza.

‎Arsenal itozwa na Mikel Arteta yitwaye neza muri uyu mukino, igaragaza ubwitange mu bwugarizi no gukoresha neza amahirwe yabonye. Igitego kimwe cyabonetse ku munota wa 45' gitsinzwe na Bukayo saka cyayifashije kubona itike y’umukino wa nyuma, nyuma y'imyaka 20 yari ishize itagera kuri uru rwego.

Arsenal yakinanye ishyaka ibasha kwegukana intsinzi 

‎Mu mateka yayo muri iri rushanwa, ntirabasha kuryegukana. Iheruka kugera ku mukino wa nyuma mu 2006, itsinzwe na FC Barcelona yari irimo Ronaldinho, Messi na Eto'o, aho yayitsindiwe i Paris mu Bufaransa ibitego 2-1. Icyo gihe yabaye ikipe ya mbere yo mu mujyi wa Londres igeze kuri uru rwego, inashyiraho amateka yo kumara imikino 10 yikurikiranya itinjizwa igitego.

‎Imibare igaragaza ko Arsenal ifite uburambe muri Champions League, kuko imaze gukina imikino irenga 200 ikanatsinda irenga 100. Yanitabiriye iri rushanwa imyaka 19 yikurikiranya hagati ya 1998 na 2017, ibintu byayigize imwe mu makipe akomeye ku mugabane w’i Burayi muri icyo gihe.

‎Muri champions league y’uyu mwaka wa 2025/26, iyi kipe yagaragaje urwego rwo hejuru, igera ku mukino wa nyuma idatsinzwe mu mikino myinshi yayibanjirije, bigaragaza ko yongeye kwisubiza ku rwego rwo guhatanira ibikombe bikomeye i Burayi.

‎‎Umukino wa nyuma wa UEFA Champions league uzaba ku wa gatandatu tariki  ya 30 Gicurasi 2026 kuri Puskás Aréna mu mujyi wa Budapest, mu gihugu cya Hungary, ubwo Arsenal izesurana n'izakomeza ku wa gatatu tariki ya 06 Gicurasi hagati ya Bayern Munich na PSG.