Mu ijoro ryo ku wa Gatanu tariki 4 Nyakanga 2025, nibwo hagiye hanze amakuru avuga ko rutahizamu William Mel Tongui yamaze kumvikana na APR FC ndetse ashobora kuba ari mu nzira zimuzana hano i Kigali.

Uyu mukinnyi w’imyaka 28 yakinaga mu cyiciro cya kabiri muri Turkia mu ikipe yitwa Ankara Keciorengucu.

Ni iki ukwiye kumenya kuri William Mel Tongui?

William Mel Tongui avuka muri Cote D’Ivoire mu gace kitwa Lakota, yavutse tariki 7 Kanama 1996, bivuze ko agiye kuzuza imyaka 29. William areshya na metero imwe na Sentimetero 85.

Uyu mukinnyi yazamukiye mu ikipe bita Espoir Koumassi akinamo umwaka umwe kuva 2013-2014 ahita yerekeza mu ikipe yitwa Diffa El Jadida. Uyu musore ntabwo yigeze ahatinda kuko aho yagiye akina henshi yahamaraga umwaka umwe gusa.

Aho yamaze imyaka myinshi ni mu ikipe yitwa FC Mechelen yamazemo imyaka 3, ahita atizwa mu gihugu cya Tunisia mu ikipe yitwa Esperance De Tunis. Kuva 2021, William yakunze gutizwa cyane kuko nyuma ya Esperance de Tunis yongeye gutizwa mu Bubiligi mu ikipe yitwa Daring Brussel ndetse no muri Hapoel Jerusalem.

Muri 2023, William Tongui yerekeje muri Tazlaspor ari ho yavuye yerekeza muri iyi kipe yitwa Ankara Keciorengucu.

Muri aya makipe yose Willliam Tongui yakiniye kuva 2013, amaze gutsinda ibitego 58 mu mikino 128.

Willliam Mel Tongui iyo urebye ku bitangazamakuru bya Turkia ubona ko yari umukinnyi ukina ariko ntabwo atsinda ibitego byinshi. Mu mikino 9 iheruka uyu musore yakiniye iyi kipe ye muri shampiyona ndetse no mu gikombe cy’igihugu, nta gitego na kimwe yatsinze ndetse nta n’umupira uvamo igitego yatanze. 

Uyu mukinnyi ukina nka rutahizamu nimero 9 bisa nkaho aje kongera kuzamura urwego kuko yatandukanye na Ankara Keciorengucu tariki 7 Mutarama 2025, bivuze ko amaze amezi 6 nta kipe afite akinira. 

William Mel Tongui yahamagawe mu ikipe y’igihugu ya Cote D’Ivory mu mwaka wa 2018 ndetse agaragara mu kibuga inshuro 5 gusa ariko nta gitego na kimwe yatsinze.  

APR FC niramuka isinyishije uyu mukinnyi araza yiyongera ku bandi baheruka kwerekanwa barimo Memel Dao, Ssekiganda Ronald, Ngabonziza Pacific, Hakizimana Adolphe, Iraguha Hadji ndetse na Bugingo Hakim.

William Mel Tongui ategerejwe muri APR FC