Ku isaya ya saa cyenda z'amanwa zo kuri uyu wa gatandatu tariki 19 Mata 2025, nibwo umukino wa Rayon Sports na Muhazi United watangiye.

Ni umukino watangiranye imbaraga nke ndetse ikipe zombi gutangira zisatirana ubona ko byanze kuko wabonaga ikipe zirimo gukinira hagati mu kibuga cyane.

Ikipe ya Rayon Sports mu mpera z'igice cya mbere yaje guhusha uburyo ku ishoti rikomeye ryatewe na Prince Elenga Kanga ariko umuzamu wa Muhazi United awukuramo wabonaga ahagaze neza. Igice cya mbere kirangira ikipe zombi zinganyije 0-0.

Igice cya Kabiri cyatangiye n'ubundi ikipe zombi zikonje cyane ariko umutoza Rwaka Claude urimo gutoza Rayon Sports akora impinduka. Abakinnyi binjiye mu kibuga ni Aziz Bassane ndetse na Ishimwe Fiston hasohokamo Iraguha Hadji ndetse na Rukundo Abdoulhman Pa Play.

Ikipe ya Rayon Sports yaje kubona amahirwe akomeye ku ishoti Muhire Kevin yateye umuzamu wa Muhazi United witwa Twagirayezu Amani awukuramo ariko Ombarenga Fitina ateye umutwe umupira uca hanze gato y'izamu.

Ku munota wa 65, ikipe ya Rayon Sports yakoze impinduka zikomeye, Prince Elenga Kanga avamo hinjiramo Adama Bagayogo. Ikipe ya Rayon Sports yaje guhita itsinda igitego ku mupira wa Kufura watewe na Ombarenga Fitina ariko umuzamu Amani awukuyemo usanga aho Adama Bagayogo ahagaze ahita aterekamo igitego cya mbere ku munota wa 66.

Ku munota wa 68, Ikipe ya Rayon Sports yaje gutsinda ikindi gitego cya Kabiri gitsinzwe na Biramahire Abeddy. Ni umupira uyu mwataka yafatiye kure y'urubuga rw'umuzamu atera ishoti rikomeye cyane umupira uruhukira mu izamu.

Ikipe ya Muhazi United igice cya Kabiri yagarutse ubona ntambaraga ifite ndetse Kandi ubona irimo gukora amakosa menshi bitandukanye no mu gice cya mbere twabonaga irimo kugenda igerageza ikataka izamu rya Rayon Sports.

Ikipe ya Rayon Sports yakoze impinduka ikura ikuramo Muhire Kevin hinjiramo Niyonzima Olivier sefu ndetse umukino uza kurangira ikipe ya Rayon Sports itsinze Muhazi United ibitego 2-0.

Ikipe ya Rayon Sports itsinze Muhazi United imaze umunsi umwe ihembye abakinnyi imishahara y'amezi 2 muri 3 bagombaga guhabwa.

Ni umukino watumye ikipe ya Rayon Sports ihita ifata umwanya wa mbere n'amanota 50 irusha ikipe ya APR FC itarakina amanota 2 kuko yo ifite amanota 48.